Mizoramah EMRS 11 sak a ni tawh

Social Welfare, Tribal Affairs, Women & Child Development minister Lalrinpuii chuan, Mizoramah Eklavya Model Residential School (EMRS) 11 sak a ni tawh a, chu'ng zinga paruk chu a taka kalpui mek a nih thu nimin khan Assembly session-ah a sawi.

Champhai South bialtu Lt.Col. Clement Lalhmingthanga zawhna leh member dangte zawh belhna Minister-in a chhan danin, EMRS 11 zinga tuna zirna kalpui meknate chu - Lunglei, Serchhip, Lawngtlai, Chawngte, Tuipang leh Ngopa te a ni.

Tlangnuam (Aizawl), Zawlnuam, Bilkhawthlir, Tlungvel leh Niawhtlangahte EMRS tur sak mek a ni a; Hnahthial, Lungsen, West Phaileng, Khawzawl, Darlawn leh Khawbungahte din belh tum a ni bawk.

Hetih lai hian, kum 2021 khan sorkar laipuia Ministry of Tribal Affairs-ah EMRS din belh dilna thlen a ni a; dinna tur khua thlante chu Aibawk, Thingdawl, East Lungdar, Reiek, Bunghmun, Sangau, Phullen, Champhai leh Bungtlang South-te ani.

Lalrinpuii chuan, tribal naupangte zirna hrang hrangah hma an sawn zual zel theihna tur leh hmun ṭha an neih theih nan Tribal Affairs ministry-in EMRS a kalpui tih a sawi a, "Zirna senso zawng zawng a thlawn vek a nih bakah hostel siamsak an ni a, seat erawh a tlem deuh ṭhin avangin entrance test tih a ngai ve ṭhin," a ti.