Veng 30-ah faina beihpui an thlak

UDPA department bultumin, Aizawl khawpuia self help group enkawl kawnga resource organisation an thawhpui NGO parukte chuan April 11, 2016 aṭanga nimin thleng khan Aizawla veng 30-ah Swacch Bharat Mission Campaign neiin, faina beihpui an thlak.

Faina beihpui thlalakah hian nimin khan NGO paruk - Open Doors, Vanapa Society, Central for Peace and Development, Goodwiil Foundation, CodNerc leh Zoram Entu Pawl-te chuan Swachhta Pakhwads - Ambedkar Jayanti hmangin, Aizawl veng 30-ah SHG member 1,000 chuangte leh sikul zirlaite anganwadi, sikul leh khawlai hmun hrang hrang tifaiin an hnatlang a ni.

NGO parukte hi Aizawl veng 30-ah an insem a; Open Doors-in Durtlang, Leitan, Durtlang North, Ramhlun North leh Ramhlun Vengtharte an tum a, Goodwill Foundation-in Chawnpui, Luang-mual, Chawlhhmun, Govt. Complex leh Zonuam, Vanapa Society-in Zuangtui, Ṭhuampui, Zemabawk, Bawngkawn leh Edenthar Veng-te an tuam.

CodNerc-in Bethlehem Veng, Bethlehem Venthlang, Chhinga Veng, Saron Veng leh Tuithiang tuamin, CPD-in Maubawk, Bungkawn, Nursery, Tuikual North leh Dinthar-te an tuam a; Zoram Entu Pawl-in Melthum, Hlimen, Saikhamakawn, Tlangnuam leh Salem Veng-te an tuam thung a ni.

Faina beihpui thlak hi nimin khan a khârna inkhawm veng hrang hrangah hman a ni a, Aizawl veng hrang hranga local council hruaitute leh YMA hruaitute'n ṭawiawmin, Swachhta Pledge (faina thutiam) an sawi rual a; leaflet/pamphlet, sticker leh calendar-te an sem bawk.