Saiha Water Supply Scheme siam mek

Cheng vbc. 20.70 senna tur, Greater Saiha Water Supply Scheme chu kumin ṭhál chhunga hman theih tura hna thawh mek a ni.

Thu dawn danin, Sai-ha mipuite châwmna atana Tuitlawk lui tui pump chhohna diesel hmang khawl chu March 18, 2016 khan enchhin a ni tawh a; electric hmang chi tui pump khawl hmanga pump-na tur siamna atan Tuitlawk kamah 33KV Sub-Station siam a ni tawh. Sub-station chu a ṭhat leh ṭhat loh hre turin P&E department inspector enfiah tura peih tawh a ni. Enfiah a nih hnuah electric current kaltirin line chu enchhin a ni ang a, a ṭhat chuan tui pump-na khawlah thlun zawm a ni ang.

Tuitlawk aṭanga Saiha khaw chunga helipad tlanga tuizém liana tui pump luhna tur tui pipe lian chu him taka hman a nih theih nan protective device vuah tum a ni a, khawl hi vuah mai theihin a hmunah phurh thlen a ni tawh. Contractor Swarn Jayanti Construction Pvt.Ltd. chuan a vuahna hmun tur dik tak hre turin mi thiam a ruai mek a ni.

GSWSS-in Tuitlawk aṭanga Saiha khaw chunga tuizem liana tui a pump chhohna tur hi km 3.911-a thui a ni a, Tuitlawk aṭanga tui-zem lian san zawng chu metre 920 a ni. Rua-hman dan chuan, GSWSS
aṭang hian ni tin tui litre nuai 25 pump thei tur a ni a, kum 2043 thlengin Saiha mipuite 49,700 an tlin thlengin mi pakhat zel tui litre 70 pe thei tura duan a ni.