KHAWTHLIR

Chanchinbu semin Jubilee lawm dawn

Mizoram Chanchinbu Sem Association (MCSA) chuan vawiin chawhnu dar 2 hian Synod Conference Centre-ah an pawl din champa vawi 25-na, Silver Jubilee an lawm dawn a, chanchinbu sem zawng zawng te, sem tawh zawng zawngte leh MCSA adviser lo ni tawh zawng zawngte tel turin an sáwm.

Heroin man

Excise & Narcotics department-a Anti-Narcotics Squad chuan, Nilaini chawhma dar 11:30 khan Sairang Road, Chanmari West huam chhungah heroin gram 148 leh a neitua puh, Lalropianga (25) s/o Lalchhandama, Tahan-D Group, Myanmar, Chanmari West-a khawsa mek nia inchhál chu an man.

MNREGA zirtir

DRDA Champhai chuan Thawhlehni khan Champhai Venglai community hall-ah, Khawzawl leh Ngopa block-ah VEC member-te tan MGNREGA chungchangah training an buatsaih a, Champhai DC Vanlalngaihsaka'n a hmanpui.

Health worker 645

Tun dinhmunah Health department hnuaiah Health worker 1,028 an awm mek a, an zinga 645 chu hmeichhia niin, 383 chu mipa an ni. Health worker zingah hian 536 chu a ngheta thawk an ni a, pali chu Mizoram sorkarin contract-a a chhawr an ni. Muster roll skilled-II mi 50 leh NHM/RCH hnuaia thawk mi 438 an awm bawk.

Kawng siam

Champhai Tlangsam khawtlang chuan tunlai hian an veng chhung kawng pawimawh laite blacktop hna an thawk. Kawng blacktop-na atan hian mipuite'n sum an thawhkhawm a, V/C-te kaihhruaina hnuaiah veng hrang hrangte an inhnatlang chhawk ṭhin a ni.

Zu man zat

Excise & Narcotics department chuan, March 2016 chhung khan zu zuar 63, zu rûi 55, rakzu litre 846.11, zu bilhlai
ṭin 1,743 leh zu sakna bêl 17 an man.