CYMA Hostel tur lungphùm CM-in a phúm Hostel khuahkhirhna dan siam a ngai: CM

Lawipu community hall bula Central YMA rama CYMA HostelCYMA Hostel sak tur lungphûm chu nimin zing khan chief minister Lal Thanhawla'n a hawng a; CM chuan, hostel khuahkhirhna dan siam a ṭul thu a sawi. Hostel hi cheng nuai 520.48 senga sak tur a ni.

Lungphùm phùm puala Lawipu community hall-a inkhawmah Chief Minister chuan, "CYMA leh School Education department-te
ṭang dunin thingtlang aṭanga Aizawla lehkha zirte tana hostel sak theih tura hma an la hi a lawmawm hle. Mamawh angin sorkarin hostel a sa zung zung thei lo. Mimal ṭhahnemngaite'n eizawnna atan hostel an dinte hi a lawmawm rualin,
ṭhat tawk lohna a awm. Chuvangin, khuahkhirh an nihna turin dan zawm tur sorkarin a siam a ngai a ni," a ti.

Chief Minister sawi danin, hostel ṭhenkhat chu khum inṭawm te, zirlai tam tak tan inthiarna pakhat chauh siamte leh infiamna hmunhma awm lo leh rîkrum thil thlen thulha hostel building sak dan remchang tâwk lote a awm.

Tunah hian Lai leh Mara puala hostel sak theihna tur sorkarin a neih tawh thu sawiin, Lal Thanhawla chuan, "Páng, Bâwm leh Bru-te pawhin hostel saksak turin Mizoram sorkarah an thlen ṭhin a, hei hi School Education kaltlanga la ngaihtuah a ni ang. Zirna ṭha kan duh chuan environment-in a zir a ngai a ni," a ti.

Central YMA president Lalbiakzuala pawhin thu sawiin, "Thingtlang aṭanga Aizawla lehkha zirte tan hostel sak hi YMA conference-ahte thutlukna siam a lo ni tawh," a ti a; hostel sak a nih theihna atana School Education department-in hma an la chu lawmawm a tih thu a sawi.

Hostel hi North East Consultancy Services (NECS)-in an sa dawn a; ruahman dan chuan, building chu block A leh B-ah ṭhen an ni ang a, chutah chuan lobby, hall, cafetaria, dining hall, hostel block, common room, reading room, wardens’ quarters, toilet, entry leh parking-te siam a ni ang. Zirlai 120 awm theihna tura tih a ni.

Hna hi thawh ṭan nghal tur a ni a, kum hnih chhunga zawh tura ruahman a ni. A senso tur sum cheng nuai 520.48 chu Ministry of DoNER-in 90% a tum a, a bak 10% chu Mizoram sorkarin a tum ang.