Tun hmaa thil thleng tawh vangin YMA-in sorkar ngenna a hnâwl

YMA Central Coordination Committee member-te April 13, 2016-a Central YMA Hall-a ṭhukhawm chuan, BPL Baseline Survey nei tura Mizoram sorkarin a ngenna an hnâwl a; sorkar ngenna an hnâwl chhan hi hun kal tawha YMA-in BPL survey a lo tih tawhah, sorkarin pawm mai loa a tihdanglam leh vang nia thu dawn a ni.

Central YMA president Lalbiakzuala chuan, Mizoram sorkara Planning & Programme Implementation department-in BPL Baseline Survey a neih turah YMA chu thawhpuiah a sawm tih sawiin, chu chu April 13, 2016-a YMA CCC meeting-ah ngun takin an ngaihtuah tih a sawi a, "Tun hma lama thil lo awm tawh avangin sorkar ngenna hi zahawm viau mah se, pawm loh mai kan rel thlu ta a ni," a ti.

Lalbiakzuala chuan, kum 2010-ah pawh khan sorkarin YMA chu BPL leh IAY list siamnaa thawhpuiah a lo sawm tawh tih a sawi a, "Kum 2010 khan CCC-in kan ngaihtuah a, inrawlh loh kan rel a, BPL Baseline Survey-a inrawlh loh hi YMA thu ding lai a ni," a ti a; tun hnaiah Planning department secretary Dr C Vanlalramsanga hnen aṭangin thawhpui tura ngenna lehkha an dawn avangin an ngaihtuah nawn leh tih a sawi.

Vanglaini palai zawhna chhangin CYMA vice president Vanlalruata chuan, tuna Planning department ngenna an hnâwl avangin sorkar an thawhpui duh lo tihna a nih loh thu a sawi a, "YMA hian thil ṭhaah chuan sorkat thawhpui kan duh reng a, ram ṭhatna tura sorkar thawhpui hi YMA thuthlungah pawh a tel a, kan sawi rual ṭhin," a ti.

Chutih rualin, sorkar hmalaknaa YMA a inrawlhin awmzia a neih leh neih loh an ngaihchan ve ṭhin thu sawiin, Vanlalruata chuan, "YMA chuan thil ṭha kan duh a, mahse, kan duhna ang hian a thleng zo ang em, tihte kan ngaihtuah tel ṭhin," a ti a; tuna BPL Baseline Survey neih chungchangah pawh, YMA duh dan anga thil a kal loh hlauhthawnna a awm thu a sawi.

Central YMA hruaitute sawi danin, BPL-in a huam chin tur thlan te, ration card siamnaahte leh IAY list thlan chungchangahte tun hma deuhin YMA chuan sorkar a lo thawhpui tawh ṭhin. Mahse, YMA lamin a dik thei ang bera list an siam chu sorkarin a nih anga pawm mai loin, tihdanglam a nei ṭhin a, political party unit level aṭanga hmunpui lam thlengin an mi duhsak zawngte thun a lo awm tawh ṭhin a ni.

CYMA Vice President chuan, YMA branch hrang hrangte chu Central YMA-a inthlungkhawm an ni tih sawiin, sorkar emaw, pawl dang aṭanga ram pum huap thila hmalaknaa thawhpuia sawm kawngah, CYMA kaltlang lo a, branch-a direct-a lehkha pek a ni tawh ṭhin a, chutiang chu an duh lo tih a sawi, "Planning department-in BPL Baseline Survey nei tura YMA a sawmnaah pawh, direct-a YMA branch-a lehkha pek eng emaw zat an awm a ni," a ti.