P&E department privatised tumna a awm - F Rodingliana

Nimin Assembly session-ah Power & Electri­city minister F Rodingliana chuan P&E dept. chu mimal enkawl tura hlan (privatised) tumna a awm thu House a hrilh.

ZPM member H Ginza­lala zawhna chhangin F Rodingliana chuan, "P&E dept. hi privatised tur chuan functional unit pathum - transmission, generation leh distribution strategic business-ahte ṭhen phawt nise tiin hmalak mek a ni," a ti a, sorkarin a lo zirchian ve phawt turin proposal thehluh a nih thu a sawi.

P&E Minister chuan ZPM member Lalchhuan­thanga zawhna chhangin, sorkarin hydel project siam turin hmalak tumna a nei tawh tih sawiin, "Tunah hian Tuivai HEP (Mw 150), Ngopa bul; Tlawng HEP (Mw 120), Lungleng khaw bul leh Turini HEP (Mw 24), Sesawng bulte hi thawh a nih theihna atan hmalak mek a ni," a ti.

Hmalak tumna hmasa ber sawi mai theih a nih loh thu sawiin F Rodingliana chuan, hydel project siam tura thil ṭul pawimawh hrang hrangte leh a thawh­na tur sum hmuh hma­sak apiang thawh nghal zel a nih tur thu House a hrilh.