MPSC-in kum 2010-2024 (February) chhungin service pasarihah post 1,266 an hnawh khat

Kum 2010 aṭanga February 2024 thleng khan Mizoram Public Service Commission (MPSC) chuan Mizoram sorkar hnuaia service pasarih, entry grade/junior grade (pay level-10) atan direct recruitment-in post 569, limited departmental examination (LDE) kaltlangin post 134, induction-in post 28 leh promotion-in post 535, a vaiin post 1,266 a hnawh khat.

RTI hmanga zawhna MPSC-in a chhan danin, kum 2010-2024 (February) thleng khan Mizoram sorkar hnuaia service pasarih - Mizoram Secretariat Service (MSS) post 314, PWD hnuaiah Mizoram Engineering Service (MES) post 117, MES (Power & Electricity) post 83, MES (Public Health Engineering) post 49, MES (Minor Irrigation) post 33, Mizoram Police Service (MPS) post 190, Mizoram Civil Service (MCS) post 130, Mizoram Health Service (Doctor) post 223, Mizoram Finance & Accounts Service (MF&AS) post 105 leh Mizoram Information Service (MIS) post 22 hnawhkhah nan kawng hrang hrangin hnalak a buatsaih a; a vaiin heng service hnuaiah hian hna 1,266 a la ni.

MPSC-in hnalak dan hrang hrang - direct recruitment, LDE, induction leh promotion hmanga post ruak a hnawhkhah 1,266 zingah MES (PHE) sanction post 110 zinga 49 (44.55%), MES (PED) sanction post 251 zinga post 117 (46.61%) leh MCS sanction post 257 zinga post 127 (47.55%)-te chu sanction post an neih aṭanga chhûta post hnawhkhah tlem zual pathum an ni.