Rualkhai zawka zirtirtu sem tum a ni - Education Minister

Nimin Assembly session-ah Education minister Dr Vanlalthlana chuan, rualkhai zawka zirtirtu sem a nih theihna atan transfer & posting rules siamṭhat mek a nih thu a sawi.

Zawhna hrang hrangte chhangin Dr Vanlalthlana chuan, dan neih sate tidanglamin transfer & posting rules an siamṭhat dawn thu a sawi a, "Siam zawh a nih hunah rules nei ringawt loin a taka hman a ni dawn. Mizoram hmun hrang hrangte category A, B, C leh D-ah dah a ni. Sikul pakhata zirtirtu 13-te an awm laiin pakhat chauh neite an awm," a ti.

Zirtirtu pakhat chauh awmna sikul 66 a awm thu sawiin Education Minister chuan, "Hei hi kan sorkar aṭanga kum khat chhungin tihbo vek kan tum. Department-in hma an la mek," a ti a, zirtirtu indaih lohna beng sika ngaihtuah mek a nih thu a sawi.

Education Minister chuan inthlan dawn hnaiah zirtirtu transfer a tam thu sawiin, "Political transfer chung­changah report kan dawng nasa hle. Transfer & posting-ah poli­tical transfer nia hriatte chu ngaih pawimawh hma­sakah kan nei dawn," a ti.

An department-ah aikal la mi 532 an awm thu sawiin Education Minister chuan, "Aikal lak hi tihtawp vek theih a ni lo. Damlohna thil avangtea aikal la a awm theih a, mihring mihrinna aṭanga ngaihtuah a ngai," a ti a, aikal lak chu theihtawp chhuaha tihtawp an tum thu a sawi.

Dr Vanlalthlana chuan, aikal la eng emaw zat chu an post-ah an let leh tawh tih an hriat thu sawiin, "Lo sumdawng lawp lawpte pawh an awm. Kan umzui zel dawn," a ti.

Education Minister sawi danin, Aizawl khaw­pui huam chhungah Govt. Primary School 111 leh Govt. Middle School 76 a awm. Govt. Primary School-ah hian zirlai 7,454 awmin, zirtirtu 636 an awm. Govt. Middle School-ah zirlai 4,011 leh zirtirtu 634 an awm bawk.