District khawpui tinah Chapchar Kut hlim takin an hmang

Nimin khan Mizoram hmun hrang hrangah Chapchar Kût lawm a ni a; minister, MLA leh disrtict bawrhsapte'n an hmanpui. Chapchar Kût lawmnaah hian Mizo hnam ziarang hrang hrang zai leh lam hmanga entir a ni.

LUNGLEI

Lungleiah chuan C Ṭhuamluaia Mualah Chapchar Kût 2024 lawm a ni a, minister Lalrinpuii chu Kût Nu niin, bawrhsap Ramdinliani chu Kût Thlengtu a ni.

Lalrinpuii chuan, "Pathianin hetiang ang Kût nei thei tur leh hmang chho zel thei tur hian hnam angin min din a, a mi kaihhruai chhoh tawhna zawng zawngah pawh lawmthu ka sawi a, min kaihruai zui zel tur pawh hian kan Pathian lo hi chu rintlak dang kan nei lo," a ti a; .

Tunlai hmasawnna leh changkanna avang hian Mizo tlawmngaihna lan chhuah dan pawh a danglam chho zel tih sawiin Lalrinpuii chuan, "Amaherawtichu, tlawmngaihna zepui leh laimu- ‘Tlawmingaihna chuan mahni hma a sial lo a, a beisei let lo a, a infak lo a, a uang lo a, hausa leh rethei a thliar ngai to a, a huaisenin a chhel em em a, a zaidam bawk’ tih hi a la pangngai reng," a ti a, tunlai mila tlawmngaihna lanchhuahtir thiam zel turin kalkhawmte a chah.

SIAHA

Siahaah chuan District Play Ground-a Chapchar Kût lawmnaah MADC CEM M Laikaw chu Kût Pa a ni a, bawrhsap Lalhmunsanga Hnamte Kût Thlengtu a ni.

M Laikaw chuan, "Pi leh puten Chapchar Kût chu lo vah zawh, hal hma siin an hmang ṭhin a, pipute khan urhsun takin an hmang ṭhin tih hria ila, keini pawh hian pi leh pute nuna entlawn tlak tam tak awm kha i hre thar leh ang u. Pi leh pute nuna pawimawh tak - tlawmngaihna, thawhrimna leh intodelhte hian kan tun dinhmunah hmun an chang tam tawh lo hle a, he Zo nun zemawi tak hi kaihthawh thar leh a hun tawh takzet," a ti.

CHAMPHAI

Champhaiah chuan Chapchat Kût lawmna hi Zotlang Sports Complex-ah hman a ni a, Champhai South bialtu MLA Lt. Col. Clement Lalhmingthanga chu Kût Pa niin, district bawrhsap James Lalrinchhana chu Kût Thlengtu a ni.

Lt. Col. Lalhmingthanga chuan, "Mizote'n Chapchat Kût, Pawl Kût leh Mîm Kût kan hmang ṭhin a, Chapchar Kût hi Kût kan nei zinga ropui ber a ni. Chapchar Kût hian kan pipute nunah tlawmngaihna leh nundan mawi a hril chhuak ṭhin a, ram lam hna la thawk zo lote puiin, lo an zawh pui ṭhin a, inremna niah hmangin inhauh a thiang lo," a ti.

Champhai district-in hriselna, zirna, tui leh kawng ṭha a mamawhte sorkarah a thlen thu sawiin Lalhmingthanga chuan, "Sangha chi keimahniin kan thar theihna tura hmala turin sorkarin min tiam tawh," a ti a; hmasawnna a awm theihna tura hma an laknate Assembly session zawhah chuan hlawhtlinna duhawm an hmuh ngei a beisei thu a sawi.

KOLASIB

Kolasib Ṭumpui Khelmualah Assembly dy. speaker Lalfamkima, bialtu MLA hoin Chapchar Kût 2024 lawm a ni a, district bawrhsap John LT Sanga chu Kût Thlengtu a ni.

Kût Pa Lalfamkima chuan, Chapchar Kût chu kuthnathawktute chawimawina Kût a nih thu a sawi a, "Kan hnam zia leh kalphungte chawikanna a ni a, Mizoram sorkar pawhin kuthnathawktute chawikan tumin budget-ah pawh Agriculture & Allied sector-ah cheng nuai 77,625 a dah a, hei bakah hian Bana Kaih Policy-ah cheng nuai 200 leh SEDP aṭangin cheng vbc 1.1 a dah," a ti a; Kût-in a kentel ṭhin tlawmngaihna, inremna, in unauna leh inpumkhatna nei turin kalkhawmte a sawm.

SERCHHIP

Agriculture minister PC Vanlalruata (Kût pa) hoin Serchhip Sports Complex-ah Chapchar Kût hman a ni a, bawrhsap David Lalthantluanga chu Kût Thlengtu a ni.

PC Vanlalruata chuan, pi pu chena Mizo hnam rohlui - Zonun zemawi a nun reng theih nan Chapchar Kût hi hman ṭhin a nih thu a sawi a, "Zonun mawi hi kan nunah a bet reng tur a ni. Hmanlai chuan he Kût hi zu leh sa nen an hmang ṭhin a, Kristian kan nih hnuah chuan zu leh ruihhlo tel loin hlim takin kan lawm ṭhin," a ti a, ruih theihthil laka fihlim turin mipuite a chah.

Kalphung thar sorkar chuan ruih theihthil, mipat hmeichhiat hmansualna leh eirukna laka fihlim sorkar leh society siam a tum tih sawiin PC Vanlalruata chuan, "Mipuite kan intodelh theih nan kut hnathawkte hmasawnna atan sorkarin ṭan a la dawn a, intodelhna lamtluang zawh tur leh hmalam pan turin in rilrute siamthar ang che u," a ti a; hnam dangte tan pawh a entawntlak, Mizo hnam ropuia siam turin Kût hmangtute a chah.

LAWNGTLAI

Lawngtlai DC pisa tualzawlah Chapchar Kût lawm niin, bawrhsap Cheemala Siva Gopal Reddy chu Kût Pa leh Lawngtlai MUP president H Liantluanga Kût Thlengtu a ni.

Cheemala Siva Gopal Reddy chuan mahni hnam ziarang vawn nun pawimawh zia sawiin, "Hnam ropuite chuan an mahni hnam thuam, lam leh ziarang hrang hrang phochhuah leh chawisan an uar hle. Chapchar Kût chu hnam ziarang pho chhuah mai bakah, hnam dangin Mizote an hriat lara, tlawmngaihna leh aia upa zahthiam hnam nihna chawinungtu ni zel ang che u," a ti.

MAMIT

Mamitah chuan Chapchar Kût hi Mangkhawngdai Field-ah lawm a ni a, Serchhip sub-hqrs president H Lalrinthanga chu Kût Pa niin, district bawrhsap VL Remliana chu Kût Thlengtu a ni.

H Lalrinthanga chuan, "Chapchar Kût hi hmanlai kan pi leh pute'n hlim leh uar taka an lo hman ṭhin a nih angin ṭhangtharte pawhin Mizo hnam nunzia pholanna leh hnam nun tarlan nan te, Kristian kan nihna nena inhne rem taka hlim taka kan hman ka duh. Zonun zemawi, tlawmngaihna chu Mizo tawh phawt chuan kan nunpui tur a ni," a ti a; Kût Thlengtu VL Remliana pawhin Kût hmang tura kalkhawmte chu Zonun zemawi - tlawmngaihna chhawm nungtu ni zel turin a chah bawk.

SAITUAL

Saitual Keifang Centenary Ground-ah Chapchar Kût lawm a ni a; minister of state Prof. Lalnilawma, bialtu MLA chu Kût Pa, bawrhsap Dr Lalngura Tlau chu Kût Thlengtu a ni.

Prof. Lalnilawma chuan, "Chapchar Kût chu Seipui khua aṭanga hman ṭan a ni a, kan pi puten an hman chhan ber chu lo an vat zo a, hliam leh harsatna lian tham tawk loa an awm chu lawmthu sawina Kût atan an hmang ṭhin a ni. Mizo culture vawnnunna a ni a, Kût kan hman hian Mizo hnam kan chawinung zel a, chumi piahlamah chuan thawhhona ṭha a piang ṭhin," a ti a, Zo nunzemawi hawn ṭheuh turin kalkhawmte a chah.

KHAWZAWL

Khawzawla Chapchar Kût lawmnaah bialtu MLA W Chhuanawma, Govt. deputy chief whip chu Kût Pa a ni a, bawrhsap K Lalrohlua chu Kût Thlengtu a ni.

Khawzawl Sub Headquarters YMA Field-a Kût lawmna inkhawmah W Chhuanawma chuan, "Kan hnam nunphung leh ziarangte hi keimahni’n kan humhalha, a boral mai lohna tura kan chawinun loh chuan tumahin min tih sak dawn lo. Kan ni tin hnathawhna hmunah emaw, kan sikul kalna hmun ṭheuhahte Mizo hnam ziarang chawilar leh chawisangtu kan nih ṭheuh a ngai," a ti.

W Chhuanawma chuan, "Mizoram sorkarin kut hnathawktute hamṭhatna tura ruahmanna hrang hrang a kalpui turte hi kan khawtlangin kan chhawr ve ngei theih nan taima leh rim zawkin hna i thawk zel ang u," tiin a bial mipuite a sawm.

HNAHTHIAL

Hnahthialah chuan Chapchar Kût hi bialtu MLA Jeje Lalpekhlua (Kût Pa) hoin hman a ni a, district bawrhsap Chuauhnuna chu Kût Thlengtu a ni.

Jeje Lalpekhlua chuan, "Chapchar Kût hi Mizo hnam ziarang phochhuahna hun a ni a, Mizo hnahthlakte inunauna leh inpumkhat thar lehna, remna leh muanna chawinuna a awm zel theih nan vawiin Kût hi hmanruaah chang se ka duh. Sorkarin kut hnathawktute a ngai pawimawh hle a, sorkar flagship programme 'Bana Kaih Policy' tihpuitlinna atana budget-a sum ṭhahnem tak dah a nite hi kut hnathawka eizawngte, ṭhalaite tan chuan thil lawmawm tak, chona thar a nih ka beisei," a ti.