Vanglaini - Thil man tito lo turin hriattir

KHAWTHLIR

CM-in enfiah

Chief minister Zoramthanga chuan nimin khan National Highway (NH) 54, Khamrang-Buichali inkar kawngpuia PWD chan a enfiah a, "Fûrpui kan hmachhawn turah NH-54 kawngpui hi a pin mai loh nan theih ang anga hmalak a, a chhe zual laite thawm

ṭhat a ngai. A ṭul a nih chuan state sorkar sum pawh a remchan dan ang zela hman ni se," a ti a; state economy inkhai chhuahna tura mamawh tam tak zingah inkalpawhna ṭha neih a pawimawh tih sawiin, thawktute chu ṭhahnemngai taka hma la turin a chah.

Chan insem

Mizoram páwn aṭanga rawn lut, Aizawl khawpuia quarantine facitity hrang hranga ni 14 chhung khung hrante chu Indian Medical Association (IMA), Mizoram Government Doctors’ Association (MGDA) leh private hospital fawng vuantute zing aṭanga din Medical Operation Team-te'n an vilpui dawn a; quarantine facility chan insemin khung hrante hriselna an enfiah ṭhin ang. Aizawl khawpui páwn lama khung hrante chu district-a chief medical officer-te'n an vil zui zel dawn a ni.

OPD sawn

Aizawl Civil Hospital (ACH) out patient department (OPD)-ah mipui inentir an tam ṭhin a, social distancing a taka kalpui a harsat avangin Medicine OPD chu May 20, Nilaini aṭang khan Dawrpui Multipurpose Centre-ah sawn a ni. ACH Medical Superintendent chuan man chawi loa hall hmantir an nih avangin Dawrpui khawtlang hruaitute chungah an lawm thu a sawi.

Ramri vengtute kan

Kolasib District Border Safety Monitoring Team-te chuan nimin khan Covid-19 doa ramri vengtu South Chhimluang leh North Thinglian task force-te hnenah buhfai ip 15, dailuah leh alu ip 8 an hlân. Team hian ramria task force duty-te an tlawh kual ṭhin a, an mamawh hrang hrangte an ngaihtuahsak ṭhin a ni.

DAWNTISEI

Thil man tito lo turin hriattir

Champhaia Legal Metrology assistant controller V Lalfakzuala chuan thuchhuah siamin, Champhai district-ah bungrua, a man pangngai (MRP) aia toa zawrh tura chheprelh leh zuar an awm nia hriat a nih thu a tarlang a; chutianga tite chu The Legal Metrology Act, 2009 leh The Legal Metrology (Packaged Commodities) Rule, 2011 hmanga hrem theih a nih thu a puang.

Legal Metrology chuan, sumdawngte chu an bungruate supply a tlem avanga chheprelh lo tur te, a man inziak sa maximum retail price (MRP) aia toa hralh lo turtein a hriattir a; MRP ziah ṭhat, thai chhiat, pawh thlâk te, ram dang bungrua, a man leh thil dang inziak awm lo lak luh leh zawrh phal loh a nih thu a tarlang. Dan zâwm lo hriattir tur nei tan phone number 7005670443 leh 8257872311-ahte hriattir theih a ni.

Share this Post

Login to comment

No Comments