'HPC Artui' tlangzarh a ni

Lunglei High Powered Committee (HPC) vice chairman Lawmawma Tochhawng, MLA chuan nimin khan Lunglei district-a artuia intodelh tura hmalakna 'HPC Artui' chu a pisa conference hall-ah a tlangzarh.

Lawmawma To­chhawng chuan, artuia Lunglei district a intodelh theihna tura hmalaknaa hlawhtlinna hmuh mek a ni tih sawiin, Lungleia ar vulhtu society hrang hrangte taimâkna chu a fak a; hmasawnna kawng zawh a, ṭhahnemngai taka bei chhunzawm tura a duh thu a sawi.

HPC Vice Chairman chuan, an hmalakna chu ṭhalaite tana fuihna leh chona thar siamtu ni thei se a duh thu sawiin, "Ṭhalai tam zawkte mahni kutkawiha eizawnna kawng zawh tura HPC kaltlanga hmalak chhunzawm zel tum a ni," a ti a; Covid-19 laka invènna tur sorkar thuchhuakte zâwm turin mipuia ngen nghal.

HPC Artui project hi Zobawk South, Ramthar Vegn, Pukpui, College Veng leh Lunglawna cooperative society pa­ngate kaltlanga kalpui a ni a, Rainbow Rooster ar notê 10,000 hmangin December 2019 khan bul ṭan a ni.



Share this Post

Login to comment
No Comments