Covid-19 in intodelh duhna a tuh - Agriculture Minister

Agriculture minister C Lalrinsanga chuan, Covid-19 hripui léngin Mizote thinlungah intodelh duhna leh pawimawhna a tuha a hriat thu a sawi a, "Kut hnathawktute ngaihhlutna a lian chho ta. Danglamna thleng hi a lawmawm tak zet," a ti.

Agriculture Minister hian nimin khan Melriatah Roadside Market leh Organic Vegetable Market Chain a hawng a, thu sawiin, "Tuna hri lêngah hian kan ngaihtuahna tihdanglamin a awmin ka hria. Tun hma chuan intodelh duhna leh pawimawhna sawi ṭhin mah ila, thin­lungah a awm tak tak lo. Sawi ringawt a ni. Tunah chuan a theihna hmun apiangah miin eng emaw tal thar chhuah an tum tawh," a ti a; hmunhma nei lote pawhin polypot hmangte'n thlai an chîn thu a sawi.

Mission organic project rei tak kalpui tawh a nih thu sawiin C Lalrinsanga chuan, "Organic movement chak taka kalpui hi thil ṭul tak leh tihmâkmawh a ni. Chief Minister hian organic movement a ngai pawimawh a, chu chuan mipui hriselna a ngai pawimawh tih a tichiang.  Khawvelin a ngaih pawimawh chu chemical tel loa thlai chîn a ni. Chemical fertilizer nena thlai chin ei nasat hian hriselna a tichhia niin a lang," a ti.

Agriculture Minister chuan loneitute chhan an tum thu sawiin, "Loneitute'n an thlai an hralhnaah middle man an awm ṭhin a, chu'ng mite chu an hlâwk ber ṭhin. Heng hi a tàwp theihna atan hma kan la dawn," a ti a; khârchhawngtute leh a zuar chhawngtute tana hlâwkna awm tho si, loneitute an hlâwk zawk theihna tur an ngaihtuah thu a sawi.

Inkhawmah hian Agriculture Development Board vice chairman H Biakzauva, MLA leh Horticulture Development Board vice chairman Prof. F Lalnunmawia te pawhin thu an sawi.

Roadside Market hi Aizawl District Spices Producer Organisation-in organic farm aṭanga an tharte lâk khawmna leh zawrh chhuahna atana hman tur a ni a; chemical hmanga thar chhuahte chu Aizawla chêngte tan online marketing hmangin lei theih a ni ang. Online market hi MizDen-te'n an buaipui dawn a ni.




Share this Post

Login to comment
No Comments