SASCI hnuaia sorkar hmasain hna a pekte tu mah kan cancel-sak lo - PWD Minister

Nimin Assembly session-ah INC member C Ngunlianchunga zawhna kal zela zawhbelhna chhangin PWD minister Vanlalhlana chuan SASCI hnuaia sorkar hmasain hna a pek tumah cancel sak an nih loh thu House a hrilh.

Vanlalhlana chuan sorkar kum kal mekah SASCI aṭangin cheng vbc. 500 hmuh tura tih a nih thu sawiin, "1st instalment cheng vbc. 206 hmuh a ni tawh a, department dang pawhin an chang a, PWD-in kan chang hnem ber. 2nd instalment a lokal dawn em tih a chiang loa, chuvangin 1st instalment-in a dah tura hna sem rual a ngai," a ti.

SASCI sum sanction a nih hnu lawkah inthlan puan a nih thu sawiin PWD Minister chuan, "Kan han zirchiang a, election fund anga hman tumna party ṭhenkhat rilruah a awm niin a lang. Campaign fund ang deuhin an hmang. Thil fel lo leh phuailuai deuh tam tak a awm," a ti a, SASCI hna sem dan chuan rotling dinna lam a hawi loh thu a sawi.

Vanlalhlana chuan Chief Minister-in kalphung thara kal a duh avangin work order hum tawhte leh hnathawk tawhte cancel loh turin thutlukna a siam thu sawiin, "Mi pakhat hminga hna pek, a hnuaia party worker tam takin an thawh turte a awm. Mah se, kan cancel sak sak lo, kan thawhtir vek dawn," a ti.

PWD Minister sawi danin, SASCI hnuaia hna pekte hi tumah cancel sak ni dawn lo mah se, 2nd instalment a lo kal dawn em hriat a nih loh avangin 1st instalment-in a huam theih chin tura hna sem rual a ngai thung.

SASCI sum a lokal leh a nih chuan sorkar hmasa anga kalpui mai mai tum a nih loh thu sawiin PWD Minister chuan, "Ram tana rotling mumal taka siamna atan kan hmang dawn," a ti.

SASCI hnuaia hna pek chungchangah hian Chief Minister chuan sorkar hmasain an party worker-te hna a pek cancel sak an nih loh thu sawiin, "Thawk ṭha lo leh thawk muangte pawh an awm. Mah se, chungte pawh chu kan cancel sak chuang lo," a ti a, hna cancel sak a nih loh rualin sorkar tharah chuan hnathawh uluk taka endik a nih dawn thu a sawi.