Sports Minister-in field te lutuk ngaimawh

Nimin Assembly session-ah Sports minister Lalnghinglova Hmar chuan BJP member Dr K Beichhua zawhna UDPA minister K Sapdanga'n a chhanna kal zelah Mizorama sum tam tak senga field siam tam tak a te lutuk a ngaimawh thu a sawi.

Dr K Beichhua chuan Thosai field chu field zau tak a nih avangin thil dang atan pawha hman an duhlaiin, thildanga hman theih tawh loh turin a lai taka airtificial turf phah a nih thu sawiin, "Field hi a te a, minimun standard size-a siam a ni," a ti.

K Sapdanga chuan field chu football pangngai taka khelhna a tlin loh avangin official-a hawn a la remchan loh thu sawiin, "Cheng nuai 395.53 sen a ni a, bill pek kim a la ni lo," a ti a, field lian zawka siam dan ngaihtuah mek a nih thu a sawi.

Sports Minister chuan Mizoram cheng vbc. tam tak senga field siam a te lutuk ṭhin a ngaimawh thu sawiin, "Thosai field hi pakaw field pawh a tling lo, football pangngai khelh theihna a ni lo," a ti.

Lalnghinglova Hmar chuan Zemabawk, Tuivamit, Edenthar leh Chite Venga field siam mekte an tlawh thu sawiin, "FIFA-in a pawm chin metre 105-68 tal a tlin theihna atan kan in dawr mek," a ti a, standard size pawh tling lo lutuka field siam pawi a tih thu a sawi.

Tlangram kan nih avangin a hmunhma lamah harsatna a awm theih thu a sawi rualin Sports Minister chuan, "Standard size tal siam dan erawh ngaihtuah a ṭul hle. Sum sen a tam ṭhin si," a ti.