Mizoram Scholarship Board (MSB) chuan kumin June thla chaw­hma lamah pre-matric scho­larship leh post-matric scholarship second instalment sem hman an inbeisei.

MSB hotute chuan Vanglaini palai zawhna chhángin, pre-matric scholarship leh post-matric scholarship second instalment tur May 15, 2020 khan sanction order an dawn tawh thu an sawi a, "Email hmanga sanction order kan hmuh veleh sorkarah kan bawhzui nghal a, allocation-te kan la buaipui mek a, file kal kual chhung a rei ṭhin avangin June thla chawhma lamah chuan a la daih loh zawng zawngte kan sem hman vek kan beisei," an ti. 

Zirlaite chu fimkhur tura an duh thu sawiin MSB hotute chuan, "Common service centre (CSC)-ah te, college-ah SU leh ṭhiante kaltlangtein scholarship form an fill-up ṭhin a, an bank account number leh IFSC number-te an cross check leh ṭhin lo a, hei vang hian scholarship luh huna lut ve lo an awm phah fo," an ti a; scholarship lut ve lote tan complaint theih reng a nih thu leh kum thar aṭang chuan khauh taka kalpui an tum tawh thu an sawi.

MSB hotute sawi danin, scholarship second instalment aṭanga pek tura tih zingah Mizoram páwna zirlai te, RIPANS, IGNOU, Zoram Medical College, computer institution hrang hrang, IASE, SCERT, NIELIT, nursing institution leh DIET-a zirlaite an tel. Scholarship a thara dil (fill-up) leh theih hun tur chu dan pangngaia zirna kalpui a nih hnuah a ni ang.

Scholarship chung­-changah hian nimin khan sorkar chuan thuchhuah a siam a, "Ni 15.5.2020, Zir­tawpni khan minister  Dr R Lalthangliana hmalaknain post matric tribal scholarship pawisa kan dawn leh tur Rs. 34,46,82,000 lai kan dawng ta a, a lawmawm hle. Sanction hi tunah Finance department-in vbc. 34 budget-a dah turin an buaipui mek a, hun rei vak loah pek thuai theih a ni ang," a ti.

Share this Post