Covid-19 dan bawhchhia man ṭhin

Aizawl Traffic duty-te chuan, Mizoram sorkarin inkhàrkhip chhung atana dan a siam, The Mizoram (Con­tainment and Prevention of Covid-19) Ordinance, 2020 bawhchhia eng emaw zat an man tawh. Mahni identity card hmanga lirtheia chhungte chhuahtir an awm ṭhin tih an sawi.

Traffic SP Rodingliana Chawngthu chuan Vanglaini palai zawhna chhángin, inkhàrkhip thawh thumna tìr lam ni thum/li chhung chu DGP duh dan angin, dan chungchang mipuiin an la hriat chian tawk loh avangin dan bawhchhiahte an man lo a, hrilhfiahin an hawtir ṭhin tih a sawi a, "Khatih hun lai khan ni khatah mi 700 chuangte dan zâwm lo hawtir cháng kan nei a, tunah chuan an tlahniam tawh viau. A luhlul zual man zauh zauh kan nei," a ti.

Chhuah phalna nei zingah dan phal loha thil ti an awm ṭhin thu sawiin Traffic SP chuan, "Mi ṭhenkhat chuan phalna ID an neih hmangin an chhungte an lo chhuahtir ve ringawt ṭhin. Kan endik a, chhuah phalna nei ID ni si, mahse, anmahni ID ni miah si lote man tur an awm," a ti a; Pathianniah pawh dan bawhchhia man tur an awm nual thu a sawi.

Rodingliana Chawngthu chuan, May 4-a hman ṭan The Mizoram (Containment and Prevention of Covid-19) Ordinance chu May 9 aṭang­in khauh taka an kenkawh thu a sawi a, "Dan bawhchhiate pawisa chawi tling khawm ni khatah Rs. 20,000 a chuan chângte a awm. Hetih rual hian, Covid-19 boruak awm hmaa kan kalpui tawh sa MV Act bawhchhiate pawh eng emaw zat kan la man reng bawk," a ti.

Traffic SP sawi danin, dan bawhchhia an mante chu a tlangpuiin hmai tuamna vuah lo, social distancing zâwm lo, vantlang hmuna chil chhâkte leh central/state sorkarin Covid-19 donaa inkaihhruaina a siam leh inkhàrkhip thupek a siam zâwm lote an ni.



Share this Post

Login to comment
No Comments