Raltlante biometric enrolment tih tum rih lo; Raltlante puihna tur kan dawng - CM

Chief minister Lalduhoma chuan nimin Assembly session-ah Myanmar buaina avanga Mizoram rawn raltlante biometric enrolment tih an tum rih loh thu leh raltlante puihna tur sorkar laipui aṭanga dawn mek a nih thu House a hrilh.

Lalduhoma chuan April, 2023 velah sorkar laipui chuan Myanmar leh Bangladesh aṭanga rawn raltante biometric enrolment ti turin state-te a hrilh thu sawiin, "Khatihlaia sorkar khan a zawm a, a kalpui nghal. Training-te an pe a, nodal officer-te an ruat. Official lamin inthlan a hnai a, a buaipui a buaithlak. Thil fel lo a awm palh thei an ti. Home department aṭanga rawtna avangin Cabinet-in tih rih loh turin a rel. Sorkar ngai sorkar se chuan an zo ṭep tawh ang," a ti.

Raltlante biometric enrolment lak chu chhunzawm an tum rih lo tih sawiin Chief Minister chuan, "Illegal migrant portal min hmantir an tum a, Union Home Minister hnenah ka sawi a, thawn haw an hlauh avangin thawnkir an ni dawn lo tih min tiam tura ka tih angin, an ram hawna chi a nih hma chuan thawn haw loh min tiam," a ti a, raltlante thawn haw loh Union Home Minister-in tiam mah se, biometric enrolment chu an tih rih dawn chuan loh thu a sawi.

Chief Minister chuan The Mizoram Maintenance of Household Registers Bill, 2019 peihfel sak hmasa tura Union HM a ngen thu sawiin, "An buaipui mek a, Governor leh President inkar a ni ber tawh. Tunhnai lawkah pawh Home Ministry-in an rawn zawhfiahna chhanna tur pawh Governor hnenah kan thlen," a ti.

Raltlante theih ang angin sorkarin a enkawl thu sawiin Lalduhoma chuan, "Sorkar hmasa-ah sorkar laipuiin raltlan tan cheng vbc. thum an rawn pe, a hman dan chipchiar kan hre lo. Prime Minister leh Home Minister-in kan harsatna tawh min hriatpui. Sum leh paiah an thil phal khawp mai, min ṭanpui mek. A zat chiah erawh sawi a rem lem lo," a ti a, raltlante tana sorkar laipui inhawnnaah state sorkar chu an lawmthu a sawi.

MNF member Robert Romawia Royte zawhna Chief Minister-in a chhan danin, Myanmar raltlante biometric leh biographic lak chungchang hi ni 27.9.2023 a Council of Minister meeting-in a ngaihtuah a, Mizoram State Assembly atana inthlan hmachhawn mai tur kan nih avangin Mizoram sorkar tan he thil hi hmalak mai ngaihna a awm rih lo tiin thutlukna siam a ni.