Suarez hrem dawn lo

Barcelona striker Luis Suarez chuan Atletico Madrid defender Juanfran a pet avangin sawisel hlawh mah se UEFA lam aṭangin hremna a hmachhawn dawn lo thung.

Thawhlehni zan Champions League inkhelah Barcelona hian an mikhual Atletico Madrid chu Suarez goal hnih khung hmangin an hneh a, Uruguay international hian goal a khung hmain Juanfran chu chiang takin a pet a, German referee Felix Brych-a'n hmu lo mah se replay-ah chiang taka a lan avangin hremna hmachhawn mai thei dinhmunah a ding hman.

Atletico Madrid left back Filipe Luis chuan, "Barcelona player-te hian red card hmu turin engtiang taka an chet bik nge ngai tih pawh ka hre lo. Catalan club hi Champions League aṭangin an tlak an hlau a ni maithei," tiin a sawi hial a ni.