Mizoram páwna Mizo tangkhang ṭhahnem tak an rawn haw tawh a, an rawn haw mek zel. Hyderabad aṭangin mi 600 chuangte'n nizan khan rélin Mizoram an rawn pan a, an kal man hi sorkar laipui leh Telangana sorkarin a tumsak. Kolkata khawpui aṭanga bus hmanga May 18-a Kolkata chhuahsante pawhin Mizoram an rawn thleng kim tawh.
Hyderabad leh a chhehvela Mizo tangkhang zinga mi 600 chuangte chuan nizan dar 8 khan Hyderabad chhuahsanin Mizoram an rawn pan a, Bairabi thleng a tlan ang. Mizo haw tur zat chiah hi he thu ziah lai hian hriat thei a la ni lo a, haw duha inhriattir erawh chu mi 628 an ni. Rêlah hian Assam leh Meghalaya mite an chuang tel ve bawk.
Hyderabad Mizo Association president Dr Franklin Laltinkhuma chuan, Hyderabad aṭanga Bairabi thlenga rèl chuan man chu a thlâwn vek a nih thu sawiin, "Chuan man a awm lo. Chuan man 85% chu sorkar laipui tum a ni a, state sorkarin a tum ve tur 15% chu kan request angin Telangana sorkarin a tum vek a, kawng laka ei leh in tur pawh a tum vek dawn," a ti.
Dr Franklin Laltinkhuma chuan, "Hyderabad hmun hrang hrang aṭanga Mizo haw turte rél chawlhhmun thleng phurh nan bus 23 hman a ni a, chu'ngte pawh chu Telangana sorkarin min tumsak vek a ni," a ti bawk.
Hetih lai hian, sorkar leh Calcutta Mizo Welfare Association (CMWA) Task Force ruahman anga Kolkata-a tangkhang Mizo eng emaw zat zinga mi 111, Mizorama haw tura May 18, 2020-a Kolkata chhuahsante chuan Mizoram an rawn lut kim tawha hriat a ni.
May 18-a Kolkata aṭanga hawte hian bus paruk leh lirthei tê pakhat an hmang a; lirthei tê hmanga May 19-a chhuak mi pariat an awm bawk. Rawn haw tharte hi Mizoram sorkar chuan quarantine centre hrang hrangah an dah nghal zel a ni.
Kolkata aṭanga rawn hawte hian bus chuan man an intum a, chutih rualin, CMWA-in Rs. 1,000 ṭheuh a pài thung. A harsa zual deuh nia hriat mi tlemtê chu joint resident commissioner Jacob Lalawmpuia'n pawisa a pai bawk.
CMWA general secretary Lalbiakzuala chuan Vanglaini palai zawhna chhangin, Kolkata-a tangkhang mek lirthei hmanga haw duh mi 380 vel an la awm thu sawiin, "Nimin (Nilaini) khan an hawna tur bus-te pawh kan be tawh a, mahse, sorkar laipui lam hian kar leh Thawhṭanni aṭangin thlawhtheihna (domestic flight) thlawhtir ṭan a tum nia sawi a awm avangin, kan ngaichâng leh rih," a ti.
Lalbiakzuala chuan, Kolkata-a tangkhang zingah damlo leh damlo hruaitute an tam thu sawiin, "Damlo leh anmahni hruaitu zingah thlawhtheihna thlawh theih hun nghak hrim hrim eng emaw zat an awm a, mi 138 vel an ni," a ti a; chutih rualin, dam lohna thila zin, tangkhang ta zingah thlawhna a thlawh loh chuan lirtheia haw hnial lo pawh an awm thu a sawi.
The Mizo Welfare Association (TMWA), Delhi chuan nimin khan hriattirna tichhuakin, Covid-19 vanga Delhi, Himachal Pradesh, Chandigarh, Uttarakhand, Punjab leh Haryana-a tangkhang, Mizorama haw duhte rél hmanga an haw theihna tur ruahman mek a nih thu an tarlang.
TMWA tarlan danin, rél chhuah theih hun tur chiang taka hriat theih a la ni lo a, Ministry of Railways nen inbiak mek niin, kar lehah an haw ṭan theih beisei a ni. Delhi aṭanga Bairabi thlenna atan mi pakhatin Rs. 835 zel an chawi a ngai dawn a, chu chu mahni intum tur a ni. Rel chuan man tur nei ngang lote chu an chuan man tur ngaihtuahsak an ni ang.
Rél pakhatah mi 1,500 aia tam an len loh avangin rél pahnih tlantir tura ruahman a ni a, rél chhuak hmasa zawkah chuan man online hmanga pe hmasa 1,500-te an kal dawn a ni.
Sorkar thuchhuah tarlan danin, naktukah Odisha aṭangin mi 23, May 23-ah Kerala aṭangin mi 129 leh May 25-ah Bangalore aṭangin mi 1,500 vel an rawn chhuak leh dawn a ni.
Login to comment
No Comments