Health Minister-in Civil Hospital, Aizawl tihchangtlunna hrang hrangte a tlangzarh

Health & Family Welfare minister Lalrinpuii chuan nimin khan Civil Hospital, Aizawlah damdawi-in tihchangtlunna tur thil hrang hrang a tlangzarh a; OPD card la tura thui tak tak intlar ngai tawh loin, online hmangin pawisa a pek theih tawh dawn.

Health Minister-in a tlangzarhte chu - biometric attendance, medical record digitalization, CCTV, hospital pharmacy, Jan Aushadhi, hospital website, online OPD registration & UPI payment, SMS lab. report, OPD ticket counter leh HIV viral load machine-te a ni a; Lalrinpuii chuan, damdawi-ina thawktute chu mipui rawngbawltu an nih hre reng chunga theihtawp chhuah a hna thawk zui zel turin a chah.

Lalrinpuii chuan natna enkawlna kawnga hmasawnna pawimawh tak tur tlangzarh a ni thei chu lawmawm tiin, ṭangkai taka hman a nih hlawm a beisei thu a sawi.

Thawktute chu mipui rawngbawltu an nih hre reng chunga theihtawp chhuah a hna thawk zui zel tura chahin Health Minister chuan, "Mipui min mamawhtute avanga he department-a awm hi kan ni a, min dawrtute hi kan tana mi pawimawhte an ni. Chuvangin tute pawh i ngaipawimawh ang u," a ti.

Health Minister-in a tlangzarhte:

1. Biometric Attendance: Biometric attendance hi thla khat vel enchhin (trial run) a nih hnuah mumal zawka hman ṭan a ni.

2. Digitalization: Hospital damlo zawng zawngte an record kimchang kum 10 chhung dahṭhat a nih hnuah, kum 10 chin bak chu hal ral zel a ni ṭhin a, heng damlo history record vawn ṭhatte hi research tih nan leh thil dang atan mamawhna a lo awm tak zel avangin December, 2023 thla aṭang khan digitalized a ni a, hei hian record tam tak rei tak takte pawh him takin a vawng ṭha tawh dawn a ni.

3. CCTV: Camera 32 (dual monitoring system) chu damlote leh thawktute him zawk nan vuah (installed) a ni.

4. Hospital Pharmacy: Damlo harsa zawkte tan pawn lama man to tak taka lei ngai loa hlawkna um loa siam a ni a, a bik takin dialysis, cardiology, ICU patient-te tana tih deuh bik a ni.

5. Jan Aushadhi: Damdawi man tlawm dawr, hospital compound-ah a mamawhtute lei theih turin chhawpchhuah a ni.

6. Hospital Website: Mipuiin hospital chungchang chiang zawka an hriat theih nana duan a ni a, hetah hian OPD-a doctor ṭhut hun te, birth & death certificate dil theihna turte, hospital chhunga thil tih theih leh tih theih loh te, scheme hrang hrang awm te leh thil dang ṭangkai tak tak dah tura hmalak a ni.

Hriselna lam inzirtirna huang telh tur a hmalak tel a ni a; website address hi civilhospitalaizawl.mizoram.gov.in a ni a, mipui tana awmsam zawk nan cha.mizoram.gov.in tia thlak dil mek a ni.

7. Online OPD Registration & UPI Payment, SMS Lab. Report: Lailen Consulting Pvt. Ltd. (app)-te nen ṭangkawpin trial run neih mek a ni. OPD card la tur thui tak tak intlar ngai tawh loa, mahnia lak mai theih tura pawisa pekna nen siam a ni. Investigation result pawh a theih chin chin SMS hmanga report thawn chhuah theihna tur a ni.

8. OPD ticket counter: OPD ticket counter hi siambelh a ni a, tunah hian OPD Counter paruk awmin, PwD (vohbik), nu naupai, naupang leh kum upate tan counter hran siam a ni bawk.

9. HIV Viral Load Machine: HIV natna hrik tam leh tam lo enna a ni. Treatment response leh drug resistant hriat nante a pawimawh a, Mizorama awm hmasa ber a ni.