2024-25 Mizoram budget - vbc. 14,412.12 : Revenue expenditure tur - vbc. 11,957.04

Nimin Assembly Budget Session-ah Finance changtu, chief minister Lalduhoma chuan kum 2024-2025 Mizoram budget tur cheng vbc. 14,412.12 a pharh a; sorkar kum kal mek (2023-2024) budget aiin cheng vbc. 202.17 (1.42%) in a tam zawk. Revenue surplus cheng vbc. 564.95 awm tura beisei a ni.

Kum 2024-25 budget 14,412.12 aṭang hian sorkar hna­thawk hlawh, pension hlawh, sorkar inrelbawlna, leiba rulhna etc. (revenue expenditure) tur chu cheng vbc. 11,957.04 (82.97%) niin, hmasawnna hnathawhna tur (capital expenditure) chu cheng vbc. 2,455.08 (17.03%) a ni thung. Kum 2023-24 budget-ah chuan revenue expenditure cheng vbc. 11,068.76 (78.10%) leh capital expenditure cheng vbc. 3,141,19 (21.90%) a ni.

Budget thar turah hian kum dang zawng aiin state-in a tum ve tur a tam dawn a, 19.66% a tling. Kum 2023-24 budget-a state-in a tum ve chu 17.24% a ni.

State-in chhiah hrang hranga sum a hmuh, state own tax revenue (SOTR) chu cheng vbc. 1,312.42 niin, sorkar kum kal meka hmuh tura beisei cheng vbc. 1,084.30 aṭangin 21% in a pung. Chhiah ni chiah lo aṭanga state-in sum a hmuh, state own non tax revenue (SONTR) aṭanga sum hmuh tura beisei chu cheng vbc. 1,122.39 niin, sorkar kum kal meka hmuh tur zat aṭanga chhûtin 25.%-in a pung.

Mizoramin sum a hmuhna hnar lian ber, central-a chhiah tlingkhawm state-in an insem ṭhin (devolution of central taxes & duties) aṭangin cheng vbc. 6,098.93 hmuh beisei a ni a, kum 2023-2024 budget estimate-ah chuan cheng vbc. 5,107.25 hmuh beisei a ni.

Sum hmuhna hnar lian dang, post devolution revenue deficit grant (PDRDG) erawh 15th Finance Commission recommendation angin a tlahniam zawngin a kal a, kum 2023-24 budget-ah cheng vbc. 1,474 dah a nih laiin, kum 2024-25 ah chuan cheng vbc. 1,079 beisei a ni. Kum 2025-26 ah chuan cheng vbc. 586 ah a tlahniam dawn.

Central aṭangin loan cheng vbc. 510 hmu tura beisei a ni a, chu'ngte chu kum 50 hnua a pung awm loa rulh tur - Special Assistance to State for Capital Investment (SASCI) aṭangin cheng vbc. 500 leh block loans cheng vbc. 10 a ni.

Chief Minister hian kum 2024-25 budget a pharh rual hian Supplementary Demand for Grants 2023-2024 cheng vbc. 3,287.93 a pharh nghal.