Kolasib Sub-Hqrs MCO Silver Jubilee

Mizoram Cultural Organisation Sub-Headquarters, Kolasib chuan February 23, 2024 khan St. Joseph's Parish Hall, Kolasibah kum 25 an tlin an lawm a, district bawrhsap John LT Sanga, Kolasib Sub-Headquarters MCO Patron ni bawkin a hmanpui.

John LT Sanga chuan, Mizo hnam ziarang leh nunphung vawng nung tura pawl din chu ropui leh hlu a tih thu a sawi a, "Kan culture hi hnam damna leh hmasawn zel tura hnam min chawmtu a ni. Khawvel hmasawnna chak taka a kal rualin, mahni hnam ziarang leh nunphung (culture) vulh lian thiam apiang hnam zahawm an ni zel ang," a ti.

Culture chu hnam lam emaw, hnam thuam inbel ringawtah emaw ni loin, ni tin khawsakphung leh nungchangah a lang chhuak tur a nih thu sawiin Bawrhsap chuan, "Khawi hmunah pawh awm i la, kan hnam ziarang leh nunphung kalsan loa kan chhawm nun zel a pawimawh," a ti bawk.

Kolasib Sub-Headquarters MCO hi February 23, 1999 khan 'Mizo Cultural Club Union, Aizawl North district' tih hmingpuin din a ni a; Aizawl North district chu Kolasib district tia thlak a nih tak avangin June 23, 1999 khan 'Kolasib District Mizo Cultural Association' tia thlak a ni. Kolasib Sub-Headquarters MCO hnuaiah hian inziak lut branch/club 23 an awm mek.