Mizoram State Project Monitoring Committee din

Mizoram sorkar chuan sorkar sum hmanga project thawhte viltu tur Mizoram State Project Monitoring Committee (MSPMC) member turte ruatna February 21, 2024 khan a tichhuak a; kum khat chhung atana MSPMC member turin political party leh pawl hrang hrang aṭangin mi 12 ruat an ni.

Planning department-in hriattirna a tihchhuaha a lan danin, Mizoram State Project Monitoring Committee-ah hian chairman chu Lalduhoma, chief minister a ni a, vice chairman chu R Lalrinawma leh secretary chu Vanlalruata Sailo-te an ni.

MSPMC member mi 18 zinga paruk chu Planning additional secretary Dr Lalrinchhana, PWD chief architect George Lalzuia, PUC aṭangin Dr K Vanlaldinpuia leh MZU aṭangin H Laldintluanga, R Lalchhanhima leh Vanlal­hruaia te ruat an ni.

Political party/NGO aṭangin kum khat chhung atan mi 12 ruat an ni bawk.

Political party/NGO aiawh tur mi 12-te chu - Mizoram Kohhran Hruaitute Committee secretary Rev. R Lalrinsanga, MPCC vice president Lalnunmawia Chuaungo, MNF aiawhin Lalrinawma, BJP state spokesperson Lalremsangi Fanai, ZPM aiawhin Vanlalneiha Ralte, Central YMA president Lalhmachhuana, MUP vice president Lalbiakmawia Khiangte, MHIP president Ngurmawii Sailo, MZP president H Lalthianghlima, MSU president Samuel Zoramthanpuia, Mizoram Consumer Union aiawh Prof. Chawngsailova leh MPF secretary Rev. Lalramliana Pachuau-te an ni.

Tarlan tawh angin, chief minister Lalduhoma chuan December 20, 2023 khan Mizoram People's Forum (MPF) General Headquarters hruaitute a kâwmnaah, Project Monitoring Committee an din dawn thu leh, he committee remtihna lo chuan contract hnathawh hun pawhsei leh contract man ennawnte a theih dawn loh thu a sawi a, "State level aṭanga village level thlengin din a ni dawn a, he committee remtihna lo chuan contract hnathawh hun pawhsei te, contract man ennawn (revised)-te a theih tawh dawn loh," a ti.