Manipur-ah IRB ralthuam ruk avangin mi paruk man

Manipur police chuan nimin khan Indian Reserve Batallion (IRB) ralthuam ruknaa inhnamhnawih ni ngeia ngaih mi paruk chu Imphal ah an man.

IRB ralthuam hi mipui pung khawmte'n Thawhlehni zan khan an ru chhuak niin police chuan an sawi. IRB ralthuam an rukte hi Insas Rifles pali, AK Ghatak 2 pakhat, SLR magazines leh 9mm silaimu bawm sawmparuk a ni a, Manipur police-te hian an la let leh vek tawh a ni. Mi paruk an mante hi Magistrate chuan police-te kawl chhunzawm phalna a pek avangin police custody-ah an la awm mek a ni.

Manipur hmun hrang hrangah helpawl beihna tawka thi leh hliam an awm ṭhin avangin mipui tam tak an lungawi lo a, heng zinga ṭhalai zawkte chuan IRB post, Chingarel chu beiin an rawk ta mai nia hriat a ni. Thawhlehnia security post pahnih an beihnaah khan police lam chuan mipui hnawh darh nan silai an hmetpuak a, mi 10 -in hliam an tuar a, Okram Santosh chuan a nunna a chan a ni. Mipui lungawi lote hian State leh Central force-te'n an venghim zo lo nia ngaiin ralthuam chu mipui kutah an invenhim theih nan hlan mai turin an duh tih an sawi.

Myanmar ramriah UNLF-K mi leh sa nia hriat an man

Manipur leh Myanmar inrina-ah security force-te chuan United National Liberation Front (UNLF-K) mi leh sa ni ngeia hriat chu Nilaini khan an man.

Assam Rifle chuan an thudawn bawhzuiin Namlee bazar, Kamjong district ah hma lain UNLF-K mi leh sa nia rinhlelh chu an man, thu zawh fiah nghal niin an mi man chuan UNLF-K nen inzawmna an neih ngei thu a puang. Assam Rifle lam chuan Manipur Police hnenah chhui zui tur leh dan hmanga rorelsak a nih theih nan an hlan a ni. Thuneitu lam chuan an mi man chuan thurualpui dang a neih leh neih loh an chhuichian mek thu an sawi.