Meghalaya-in Indo-Bangla ramri hung turin a ngen

India leh Bangladesh ramria buaina chhuak ṭhin avangin Meghalaya chuan ramri a venhimna khauh zawk kengkawh tur leh,dan loa India rama lut ṭhin tihtawp nan ramri hung an duh thu an sawi.

Deputy Chief Minister Prestone Tynsong chuan sorkar lamin ramri hung chu a duh a, hemi rual hian hmun ṭhenkhata buaina awm thei chu an ngaihtuah tel a ngai tih a sawi. Ramri hung chuan loneitute ram leh khaw ṭhenkhat a ṭhen hran theih dawn avangin khaw ṭhenkhat chuan an dodal niin a sawi bawk.

Meghalaya sorkar chuan Home Ministry hnenah Indo-Bangla ramri hung turin ngenna mumal taka an theh luh tawh thu an sawi. Dy. CM Tynsong chuan Jaintia Hills leh East Khasi Hills lamah ramri hungna mumal tak a awm loh avangin venhimna lam a ngaihtuahawm thu a sawi a, ramri hung chu pawimawh viau mah se, ramri depa khaw ṭhenkhat chuan an dodal tlat tih a sawi lang bawk. Tynsong chuan district thuneitu lam chuan ramri hung chungchangah sorkar laipui thu pek an nghah mek avangin anmahni thuin hma an la rih lo niin a sawi. Indo-Bangla ramri hi Meghalaya state-ah km 443-a thui a kaltlang a, heng zinga a tam zawk hi mumal taka hung a ni lo.