Sonia Gandhi-i'n Rajasthan aṭangin RS seat chuh dawn

Congress parliamentary party chairperson leh party president pawh lo ni tawh, Sonia Gandhi chuan Rajasthan-a Rajya Sabha inthlan neih tur atan nomination a theh lut. Sonia Gandhi hian Nilaini khan Rajasthan-a Sanganer airport a thleng a, Rajasthan assembly-ah kalin nomination hi a theh lut nghal a ni.

February 27 hian Rajasthan-a Rajya Sabha seat pathumah inthlan neih a ni dawn a, Sonia Gandhi hian Rajasthan aṭang hian Rajya Sabha seat hi a chuh dawn a ni. Rajasthan-ah hian Congress hi eptu an ni a, rorel lai BJP chuan seat hnih an chang tura ngaih niin, eptu lam hian seat khat an chang thei tura ngaih a ni thung. Sonia Gandhi-i'n Rajya Sabha seat chuh tura nomination a theh luhnaah hian Rahul Gandhi leh Priyanka Gandhi Vadra bakah Rajasthan chief minister hlui, Ashok Ghelot leh Rajasthan Congress president, Govind Singh Dotasra te chuan an ṭawiawm.

Rajasthan-ah hian Rajya Sabha seat 10 a awm a, seat paruka MP-te hi Congress niin, seat palia MP-te hi BJP zawm an ni thung a ni. Seat pathuma inthlanna neih tur a nih chhan hi April 3-a Prime Minister hlui, Manmohan Singh leh BJP hruaitu, Bhupendra Yadav te term a tawp dawn avangin seat pahnih hi a awl dawn a, seat pakhat hi 2023 assembly inthlana thlan tlin a nih avanga BJP mi, Kirodi Lal Meena ban dawn vang a ni. Sonia Gandhi hi thlan tlin a nih chuan Lok Sabha-a term nga chhung MP a nih hnua Rajya Sabha MP anga a term hmasa ber a ni ang.