SC-in electoral bond constitution kalh a nih thu puang

Chief Justice of India, DY Chandrachud kaihhruai, judge panga ṭhut Supreme Court bench chuan nimin khan political party-te'n a petu hriat loh hnen aṭanga pawisa an dawn ṭhin, electoral bond scheme chu constitution kalh a nih thu an puang.

A petu tarlang loa political party-te tana sum thawhna, electoral bond hi January 2, 2018 khan sorkar laipui chuan a hmang ṭan a, hemi hnu hian Congress hruaitu, Dr. Jaya Thakur bakah, Communist Party of India (Marxist) leh NGO, Association for Democratic Reforms (ADR) te chuan electoral bond scheme chu hriat loh hnen aṭanga political party-te sum dawnna hmanrua a nih piah lamah, vote thlaktute'n an thil hriat tura chanvo an neih daltu a ni tiin an khing a ni.

Electoral bond scheme khinna hi nimin khan Supreme Court hian thutlukna a siam a, court thutlukna chuan electoral bond hian India constitution-a article 19(1), right to information a kalh thu tarlan a ni. Court hian a petu tarlan loh hnen aṭanga pawisa dawn theih nana Income Tax Act leh Representation of people act siam ṭhat chu a hnawl bawk.

SC-in electoral bond dan kalh a nih thu a puan hnu hian State Bank of India hnenah political party-te'n electoral bond hmanga sum an dawn leh dawn dan kimchang tarlang a, March 6 hmaa Election Commission of India hnena theh lut turin an hriattir chhunzawm nghal bawk a ni.

Supreme Court hian political party-in electoral bond kaltlanga sum a dawn, an la lak chhuah lohte chu pe let leh vek turin a ti a, pawisa lo dawngtu bank-te hian pawisa thawhtu hnenah an pe let leh vek dawn a ni. Sorkar laipuiin electoral bond chuan politics-a black money awm tur a ven thu sawi mah se, court hian electoral bond chu dan kalh leh eng hmang maha sawi mawi theih a nih loh thu leh, lang tlang loa sum thawh kalpui chuan phal chin bik neihna a lantir zawk thu an sawi.