Mizoram-a Digital Screening Cinema awmchhun Rempham'Ly

Mizoramah kum 1950 vel aṭang khan cinema chhuah ṭan niin, Aizawl leh Mizoram khawpui dangahte chhuah ṭhin a ni. Cinema Hall tin hi a lun thei hle a, ticket black-a hralh pawh sumdawnna hlawk tak a ni pha ṭhin. An film chhuahte kha reel vir muai muai chi (spool) niin, release a nih aṭanga rei tak hnuah Mizoram a lo thleng ve chauh ṭhin a ni.

Kum 1990 chhoah cable TV, cassette/VCD library leh hmuhnawm dang a awm chhoh ṭan avangin Cinema Hall lam a lun lo tial tial a, 1997 chhoah chuan cinema hall-te hi an tawp ta hlawm a ni.

Hetih lai hian tunlai changkanna mil zelin khawvel pumpui a lo inthlunzawm chho a, film pawh an release ni la lain Cinema Hall zawng zawngte'n an chhuah rual thei ta zel a ni. India ram state dangah pawh hetiang veka kalpui a ni ta a, Mizoramah kalpui ve turin RemPham'Ly chuan hma lain, internet connectivity leh transport communication duhthusam lo tak karah, PVR te biain an inrem a, world class Hollywood/Bollywood standard veka siam leh khawlte dah a ni ta a ni. Digitalised leh release nia en theihna a nih tak avangin, Rempham'Ly hi tun dinhmunah chuan Mizorama Premiere Digital Screening Cinema hmasa ber leh awmchhun a ni rih. Kum 2019 aṭang khan movie release thar chu release ni ngeiin Mizoramah en theihin a lo awm ve ta zel a ni.

RemPham'Ly theatre hi a lian hran lo a, seat 52 niin ni tin show 3-5 a awm ziah a, chawlh/awl ni a awm lo. Security check uluk taka nei vekin, thianghlim leh felfai taka enkawl a ni. Khawi hmun aṭang pawhin mahni hun neih remchan dan anga thlan theih turin NOW SHOWING, Seat layout, timing, rates, upcoming.movies etc. online- (bookmyshow.com)in a check vek theih a, a book theih nghal vek a ni. Offline pawhin a hmunah booking hi a tihtheih tho bawk.