KHAWTHLIR

Assam Dy. Speaker

Nimin khan Mizorama zan khat riak tura rawn zin Assam dy. speaker Numal Momin chuan Mizoram Assembly speaker Lalbiakzama chu a pisa-ah a kawm a, state pahniha Assembly Session kalpui dan leh Assembly Secretariat chhung inrelbawlna kaihhnawih thil hrang hrangte an sawidun. Mizoram Assembly Speaker hi dy. speaker Lalfamkima'n a ṭawiawm a ni.

Laptop tiam

Thorang bialtu MLA R Rohmingliana chuan nimin khan Gov't Lungsen High School leh Higher Secondary School-a tlawh a, HSLC leh HSSLC exam an neih dawn avanga zirlai study camp-a awm mekte hmaah thu sawiin, "Thorang bial chhung zirna sikul aṭanga class -X leh class-XII ah distinction-a pass zawng zawngte laptop ṭha tak pek vek ka tum," a ti a, an camp chhunga an ei leh in senso atan pawisa a hlan nghal.

Kuhva rah man

Assam Rifles leh Custom Preventive Force, Champhai ṭangkawp chuan February 14, Nilaini khan Hmunhmelṭha, Champhai district-ah dan loa Myanmar aṭanga lakluh kuhva rah ip 38 an man. Kuhva rah ip 38 hi cheng nuai 21.28 man hua chhût a ni.

Lawmpuin hlan

Governor Dr Hari Babu Kambhampati chuan nimin khan Raj Bhavan-ah kumin Republic Day lawmna programme lian ber New Delhi-a neih tak puala Republic Day Camp (RDC)- 2024 a tel, NCC cadet palite hnenah lawmpuina atan laptop leh thuziak a hlan. Governor-in lawmpuina a hlante hi 1 Mizo Air Sqn. NCC aṭangin cadet under officer KC Lawmsangpuia, cadet corporal H Malsawmtluanga, cadet corporal celine Vanlalhriati leh 1 Mizo Battalion RDC aṭangin cadet corporal C Lalruat­mawiate an ni.

Awareness campaign

Mamit Chhimveng YMA Hall-ah nimin khan Administrative Training Institute leh Mizoram Consumers' Union (MCU) ṭang­kawp buatsaihin Consumer Awareness Campaign neih a ni a; MCU vice president C Laldawngliana'n consumer-te dikna leh chanvo a sawifiah.