Union MoS-in Siaha-ah hun a hmang

Union Minister of State for Health & Family Welfare Prof. SP Singh Baghel chuan February l4, Nilaini khan Siahaa Maraland Gospel Centenary Hospital a tlawh a; chumi hnuah MADC Residential conference hall-ah Mara Thyutlia Py (MTP) leh Mara Students' Organization (MSO) hruaitute a kawm.

Prof. SP Singh Baghel chuan MTP leh MSO-te hnathawh leh hmalakna, khawtlang tana an inpeknate chu fakawm a tih thu a sawi a, "Mara hnam tana in hnathawh hi mipuite'n an hre reng tawh ang. Hmalam hunah pawh theihtawp chhuah zel ang che u," a ti.

MTP hruaitu chuan Union MOS hnenah hian platinum jubilee an lawmna tur leh youth festival hmanna tur atana an mamawhte bakah, Chhimtuipui luia tui tla an awm chang a mawhphurtu ber pakhat an nih avangin life saving board an mamawh thute an thlen a; MSO hruaitute pawhin conference an hmanna tur leh mamawh dang an neih te an thlen bawk.

Union MoS hian an thu thlente chu a ngaih pawimawh thu lo hrilhin, Delhi-a a thlenthlak hunah theihtawp a chhuahpui dawn thu a hrilh.

Maraland Gospel Centenary Hospital a tlawhnaah Prof. SP Singh Baghel chuan charity hospital a nih anga mipuite tana an rawngbawlna chu ropui a tih thu a sawi a; Maraland Gospel Centenary Hospital-in sorkar laipui aṭanga ṭanpuina tam zawk a hmuh theih nan theihtawp chhuahpui a intiam bakah, mipui tam zawk thleng phak rawngbawlna an neih theih nan Pradhan Mantri Jan Arogya Yojna (PM-JAY) hmang ve thei tura hma la turin a chah.