CM-in Union HM nen an inbiakna aṭangin ramri hung tum helh chiam chiah a ngai lo: Buai hmain Assam nen inbiak kan tum - CM

Guwahati leh Delhi-a a zin hnua nimina rawn haw chief minister Lalduhoma chuan Union Home minister Amit Shah nen an inbiakna aṭangin Indo - Myanmar ramri hung tum helh chiam chiah a ngaih loh thu leh Assam sorkar nen ramri buai hmain inbiak an tum thu a sawi.

Chief Minister hian nimin tlai khan CMO conference hall-ah thuthar thehdarhtute kawmin, Union Home Minister hnenah ramri hung leh free movement regime (FMR) tihtawp an duh loh thu a thlen nawn leh thu sawiin, "Kan inbiakna boruak a lawmawm ka ti. Ramri an hung dawn lo erawh ka ti ngam lo," a ti.

Lalduhoma sawi danin, Amit Shah nen an inbiakna aṭanga ngaihtuahin ramri hung tur helh chiam lo ila a sual lo maithei a ni.

Buaina avanga Zo hnahthlak rawn raltlante enkawl an nih danah tlawmngai pawl leh kohhrante chunga an lawm thu sawiin Chief Minister chuan, "Union Home Minister nen kan inbiakna aṭangin raltlan enkawlna kawngah harsatna kan nei lo turah kan ngai, a inhawng viau. Duhthál erawh chu kan hmu kher lo ang," a ti.

Lalduhoma chuan NGO-te'n boruak ṭha tak an siam avangin central dawr pawh a nawm phah tih sawiin, "Chutihrual erawh chuan Mizo leh Kristian kan ni a, kan tih àwm leh àwm lo thliar thiam a ṭha. Lim inhalsakte hi thi rawh se intihna a ni," a ti a, harsatna tawh phah theihna a nih avangin lim inhalsak chu thleng tawh lo se a duh thu a sawi.

Chief Minister chuan Assam Chief Minister nen ramri chung­chang an sawi dun thu sawiin, "A rang lama ramri chinfel kan duh a, buai hma ngeiin. Ramri hrula awmte'n buai an hlau," a ti.

Ramriah buaina siam lo tura an inrem thu sawiin Chief Minister chuan, "Buaina a awm a nih pawhin chinfel vat ni se kan ti. Aruna­chal Pradesh leh Meghalaya nena an inrem dan kalphungte pawh kan en dun," a ti a, remchang hmasa berah Assam CM-in ramri enkawltu minister Mizoramah a rawn tirh dawn thu a sawi.

Lalduhoma chuan tun ṭum Delhi-a a zinnaa a hmuhchhuah chu PMO a thu tih leh sorkar hnathawkte'n sorkar lai an thlawp ṭha tih a nih thu sawiin, "Sorkar hnathawkten sorkar lai support loh an hlau. Sorkar thlawp lo chu an lêng lawp lawp. An insiamrem ṭha," a ti.

Sorkar dinglai thlawp thei lo ang emaw zawnga che awm lo hram hram se a duhthu sawiin Chief Minister chuan, "Sorkar hnathawk an nih angin sorkar lai thlawp mai se," a ti a, Delhi-a sorkar hnathawkte chu pisa hun chhung vawndik kawngah pawh an entawntlak thu a sawi.

CM Duhoma chuan ramngaw humhalh chung leh raw material neihte hmang ṭangkai chunga hmasawnna kalpui an duh thu sawiin, "Hmasawnna kan neih dawn chuan tawrh chin erawh kan neih a ngai. Hmasawnna tikhawtlai leh tiṭhuanawp zawnga ramngaw humhalh erawh ṭha kan ti lo," a ti.

Fake account chungchanga zawhna chhangin Lalduhoma chuan, "Anmahni kan huat vang a ni lo. Chhui chhuah theih loa kan ngaih chuan political party mai ni lo, ṭhenawm leh mimal inbeihna atante kan la hmang ang," a ti a, fake account chu Mizo society tan a ṭhat loh thu a sawi bawk.

CM thusawi dangte

▶ Prime Minister hnenah project lian tak pahnih ka dil a, kan hmu dawn em a la hriat loh avangin sawi lan a la rem loah ka ngai.

▶ Union Health Minister-in ZMC-in inspection a paltlang ngei theihna atan ṭanpuina min pe dawn.

▶ Union Railways Minister-in Sairang - Hmawngbuchhuah thleng rel kaltir a sawi a, mipui kan ràwn phawt tur thuin ka chhang. Mipui duhdanin kan kal ang.

▶ Vanapa Hall sak ṭhatna atan Ministry of Tribal Affairs-ah cheng vbc 37 kan dil.

▶ Union Finance Minister leh Minister of State for Finance ka kawmna aṭangin beisei ai hmain Mizoram Development Bank kan neih theih kan beisei.

▶ A maintenance leh thawktu lama harsatna awm tur, vawi khat sum rawn kal ît vang ngawta sum siamna atana ruhrel din kan tum lo.

▶ Sum ti chhuak thei tur, amaha intodelh tur rilruah a awm.