March 13 thleng Assembly session

9th Legislative Assembly of Mizoram session ṭum hnihna leh budget session hmasa ber February 19, 2024 aṭanga neih ṭan tur chuan March 13, 2024 thleng a awh dawn.

Assembly session programme kimchang chu Assembly speaker Lalbiakzama kaihhruai Business Advisory Committee chuan an duang fel tawh. Session ṭan niah Governor Dr Hari Babu Kambhampati-a'n thu a sawi dawn a, a tuk tuk lehah Governor thusawia lawmthu sawina motion sawiho a ni ang.

February 27-ah kum 2024-2025 chhunga Mizoram budget tur chu Finance changtu chief minister Lalduhoma'n a pharh ang. Session-ah hian ni tin ṭan aṭanga darkar chanve chhung budget sawihona hun hman a ni dawn a, chumi hnuah minister-te demand sawiho a nih dawn bakah, sorkar thil pawimawhte tih a ni ang.