MP K Vena'n ramri hung lo tura ngenna Union Home Minister-ah ziakin a thlen

Rajya Sabha MP K Vanlalvena chuan nimin khan India sorkarin Indo-Myanmar ramri hung a tum chu Mizoram mipuite duhdan a nih loh thu leh ramri hung hi Mizoramah tih loh ni se a duh thu Union Home minister Amit Shah hnenah ziakin a thlen.

K Vanlalvena hian Union Home Minister hnenah British sorkarin dik lo taka ramri a siam avangin Zofate chu India, Burma leh East Pakistan-ah tihluihnaa ṭhendarh an nih thu a thlen a, "He ramri dik lo tak hi India independence tirh aṭanga tun thlenga siamṭhat a la ni lo hi hnam anga inrahbehna a ni. He ramri dik lo hi siamṭhata rorelna pakhat hnuaia awm kan nghah reng laia ramri hung tumna lo awm ta hian Zofate min barakhaih hle," a ti.

India independence hnu kum 75 chhung zalen taka Zo hnahthlakte inkal pawh ṭhinna, Free Movement Regime tihtawp tumna pawh hian ramri bulhnaia chengte ve ve tan harsatna nasa tak a siam tur thu Rajya Sabha MP hian a tarlang.

Sorkar thuchhuah tarlan danin, K Vanlalvena hian All Party Leaders meeting-ah Indo-Myanmar ramri hung tumna hi ṭhulh turin a lo ngen tawh a; Parliament Session kallai mekah pawh Rajya Sabha rorel inkhawma au chhuahpui turin dilna vawi 4 a thlen chungin hun pek a ni lo.

Lok Sabha lamah Indo-Myanmar ramri hung tum a nih thu sorkar laipui Minister-te'n an sawi chhuah laia ramri hung chungchang sawi chhuah phalsak a ni lo chu hmarchhak state-a tlang mite dikna zah lohnaa a ngaih thu a sawi bawk a ni.

MP K Vena thu thlen tlangpui
▶ Ramri hung hi ramri kaltlanga dan loa sumdawnna tihtawp beiseina vang a nih chuan ramri hung hian dan loa sumdawnnate a titawp lo tih India leh Bangladesh ramri hung tawh aṭang hian a hriat theih.
▶ Bangladesh ramri kaltlanga ralthuam tawlhruk vawi tam tak ramri vengtute'n an man ṭhin dan aṭang hian a lang fiah.
▶ Myanmar nena kan inrina hi hung a nih chuan kan sangha manna ṭha tak, km 500 laia sei ramria luang mek kan luite chu ramri pawnah dah a ni dawn.
▶ Indo-Myanmar ramri hung tumna hi Mizoramah tih loh ni se.