Hand holding policy kan kalpui dawn, CSS-te nena kaihkawp tur a ni - CM

Chief minister Lalduhoma chuan nimin khan MRB Head Office conference hall-ah NABARD hmalaknaa buatsaih 'Mizoram State Credit Seminar, 2024-25' a hmanpui a, "Thlai tharchhuah lam te, thilsiam chhuah lam leh services ṭha siam theite ṭanpui turin hand holding policy kan kalpui dawn a, central sponsor scheme (CSS)-te nena kaihkawp tur a ni," a ti.

Lalduhoma chuan, Mizoramah NABARD kaltlanga hmasawnna hnathawh a tam thu a sawi a, "Hmachhawp pawh kan ngah hle, an ṭangkai hle a ni. Thlai chìnna tur short term loan (KCC) chungchang uar zawka mipuite hnena thehdarh te, Primary Agricultural Credit Societies (PACS) kan neihte mumal leh uar zawka hman ṭangkai te, self help group-te tana sum leh pai remchang tam zawk siamte a ṭha hle," a ti a, hand holding policy hmanga ṭhalaite dawmkan an tum thu a sawi.

Hand holding policy an kalpui turah bank-te'n mawhphurhna pawimawh tak an chelh dawn tih sawiin Chief Minister chuan, "A dawngtu tur beneficiary thlan thuah ruling party mi leh sa, hlawhtling lo tur tih chiang rengte kan duhsak ve ngawt dawn lo. Chu'ng mite vang chuan sorkar policy a lo hlawhchham fo tawh a, bank-te pawhin an hnena loan pêk in hreh ṭhin tih kan hria," a ti.

Lalduhoma chuan mipui sorkar an nih angin, a hlawhtlinpui ngei turte chauh an thlang dawn tih sawiin, "Uluk takin line department-te'n an vil zui bawk ang," a ti a, heivang hian bank-te tan chu'ng mite lo puih chu a nuam tawh dawn tih a sawi.

Khualzahawm Agriculture minister PC Vanlalruata pawhin thu sawiin, "Kan ramah market thlir chunga thlai chìn uar turin hma kan la a, a hun taka thlai chi ṭha an hmuh theih nana hmalak te, an theihna tipung tura farm mechanization uar zelte kan tum. Kut hnathawktute'n an mamawh hun tak zela sum hman hawh tur an neih theih nan nangni financial institution-te hi in pawimawh em em a, lo inhawng zau turin ka ngen che u a ni," a ti.

He hunah hian Chief Minister leh Agriculture Minister-te hian sorkar scheme kaltlanga kut hnathawktute hnena pek tur loan, bank hrang hrangte sanction order chu loan hmutute hnenah an hlan a; Chief Minister hian State Focus Paper- 2024-25 a tlangzarh bawk.

NABARD manager Prasada Rao, chief secretary Dr Renu Sharma, RBI general manager P Shimrah, SLBC convener Rakesh Kumar Ravi leh MRB chairman Sheryl L Vanchhong-te'n thu an sawi bawk a ni.