Dawt hmanga sum eirutu mi pathumte kum 4 leh kum 2 tang turin hrem

Aizawl District Court-a special judge (Prevention of Corruption Act) Dr HTC Lalrinchhana chuan nimin khan All India Radio (AIR), Aizawl Station-a dawta mi chhawr anga insawi leh music artist-te dawt hmanga hla record anga tarlang a, sum eirutu mi pathumte hrem an nihna a puang.

Special Judge hian mi pathum - thubuai ziahluh a nih laia AIR, Aizawl Station-a asst. director Zosangzuala, Chanmari, Aizawl; programmme executive Lalnunziri, Tui­khuahtlang, Aizawl leh LDC Judy H Lalmuanpuii, Khatla South, Aizawl te chu February 2, 2024 khan puh an nihnaah thiam loh a chantir a, nimin khan hrem an nih dan tur a puang a ni.

Zosangzuala hi kum 4 chhung jail tang tur leh cheng nuai 6 chawi tura hrem a ni a, pawisa hi a pe thei lo a nih chuan kum 3 chhung a tan belh ang.

Lalnunziri leh Judy H Lalmuanpuii chu kum 2 chhung jail tang tur leh cheng nuai 5 ve ve chawi tura hrem an ni a, pawisa hi an pe lo a nih chuan kum 3 chhung an tan belh a ngai dawn.

Special Court chuan Judy H Lalmuanpuii hi clerk hna thawk niin, a chunga a pi leh pute (Zosangzuala leh Lalnunziri) thurualpuitu mai a nih vangin hremna hi pek nep phu-ah a ngai. Lalnunziri pawh Zosangzuala hnuai ami niin, Zosangzuala ai hian a dan bawhchhiatna a nep deuh zawk avangin hremna nep deuh zawk pek âwm a ti.

Tarlan tawh angin, mi pathumte hian mi 20-te chu casual production assistant-in ṭum 54 chhawr angin dawtin an ziak a, an hlawh atana sorkar pawisa kal ral zat chu cheng nuai 2.60 a ni. Music artist 39 chu hla record angin an tarlang a, an record tak tak lo thung. Hemi atana sum kal ral chu cheng nuai 6.08 a ni.