Raltlante khuahkhirh dan tur sawiho
Siaha District Level Committee on Myanmar Refugees chu January 31, Nilaini khan an chairman Lalhmunsanga Hnamte, district bawrhsap kaihhruaiin Myanmar raltlante khuahkhirh dan tur sawiho a ni a; raltlan zingah ei leh bar lam tlachham an awm lohna tura hmalak an rêl. Siaha district-a refugee camp 41-ah Myanmar raltlan 6,044 an awm mek tih tarlan a ni.
Lalhmunsanga Hnamte chuan, Siaha district chu Myanmar nena ramri nei a nih avangin raltlan tan pan remchang ber pakhat a nih thu a sawi a, "Ramri pela lolut pawh an tam hle. Duh vang ni loin loh theih lohna vang zawkin raltante an lolut ṭhin a, mumal leh felfai zawka enkawl an nih theih nan District Level Committee on Myanmar Refugees hi din a ni," a ti.
Raltlante enkawl kawnga theihtawp chhuah ṭhintu tlawmngai pawl, kohhran leh mimalte chungah lawmthu sawiin Bawrhsap chuan, "Raltan lolut an pun belh ve zel avangin leh ram mipuite him zawk nan uluk leh awmzia nei zawka hmalak a ṭul hle a, Siaha district a lo him a, a ralmuan zel theih nan hmalak chhunzawm zel a ni," a ti a, mumal leh felfai zawka raltlante enkawl an nih theih nan thawhhona ṭha a ṭul thu a sawi.
Ṭhukhawm chuan Myanmar lam aṭangin ruihhlo, a bik takin heroin (No-4) a lut nasa tih an pawm a, "He'ng damdawite hian ṭhalai nunna a suat nasa a, ramriah uluk leh zuala fimkhur a ṭul. Ramria duty mek Assam Rifles-te'n hmalakna chak zawk an neih theih nan MTP leh khawtina VC-te bakah Mizoram Police-te'n thawhhona ṭha zawk nei se," an ti.
Birth certificate pek chhuah kawngah fimkhur a ṭul thu te, raltlan zinga nau neite chu sorkarin birth certificate pe lo tura a tih angin a ṭul anga hmalak chhunzawm te, Kenbo bike chu khauh zawka khuahkhirh a ṭul thute an sawiho a; Kenbo chu Siaha khawpui bikah tlan khap ni se, khawkar kawngah pawh permit neite chauh tlan tir ni se, an ti bawk.
Thurel dangte :
▶ Raltlan zingah ei leh bar lam tlachham an awm lohna turin theih ang angin hmalak ni se.
▶ Tun dinhmunah Lopu leh Lomasu raltlan camp-te'n ei leh barah harsatna an tâwk ṭan a, a hma lamah sorkar hotute hnenah thlen ni se.
▶ Raltlan lo luhbelh thei reng dinhmunah Siaha district- a awm avangin lo inralrin lâwk ni se.
▶ Raltlan camp-a damdawi lam thiamte'n clinic an neih ṭhin chu a ṭul ang zelin lo chhunzawm se.
▶ Raltlan lo lut tharte zingah registration mumal taka ti an awm lo.
▶ Raltlante hian DC pisa aṭangin ID la chhuak vek tawh se, ID nei lote chu man chhuah zung zung ni se.
▶ Village Level Committee on Myanmar Refugees-te chu uluk leh chak zawka hma la tura tih ni se.
▶ Tuna raltlan lo awm nghet tawhte zingah pawh ID nei lo an awm em tih endik ni se.
▶ DC pisa aṭanga phalna la lote district dangah an kal ṭhin.
▶ Raltlan kaihhruainaa sorkar dan ding lai chu mipuite hnenah zau zawka puan darh ni se.
▶ Raltlan camp-ah dawr siam a ṭangkai hle rualin, khaw chhungah erawh chuan raltlan tan dawr hawn phal loh ni rih mai se.
▶ Raltlan zingah khaw chhunga dawr hawng an awm nual a, hemi chungchang hi trade license pe theitu MADC lamte nen sawiho leh ni se.
▶ Raltlante dinhmun an hriatthiampuiawm hle rualin, a ram leilung fate himna chu thil pawimawh hmasa a ni.