FMR tihtawp tum leh ramri hung tum CM-in a duh loh thu PM leh HM a hrilh

Chief minister Lalduhoma chuan, Free Movement Regime (FMR) tihtawp tum leh India-Myanmar ramri hung tum an duh loh thu India Prime Minister leh Home Minister a hrilh tawh thu a sawi.

Mizo Zirlai Pawl (MZP) Gen.Hqrs hruaitute chuan nimin khan chief minister Lalduhoma a pisaah an hmu a, Free Movement Regime (FMR), India-Myanmar ramri hung leh National Institute of Technology, Mizoram chungchangte an thlen.

MZP chuan, FMR ṭhiah leh ramri hung tumna chu theihtawp chhuaha dodal tlat an tum thu sawiin, an hmalakna thláwp turin CM an ngen a ni. CM chuan, FMR ṭhiah tumna leh ramri hung tumna awm chu a duh loh thu Prime Minister leh Union Home Minister hnenah a thlen tawh thu a lo hrilh tih MZP chuan an tarlang.

NIT, Mizoram chungchang an sawipui chungchangah CM chuan, a rang thei ang bera hmalak a tum thu leh NIT Chairman nen pawh an inbiak tawh thu a lo hrilh tih an tarlang bawk.

MZP hruaitute chuan nimin vêk khan Commerce & Industries department leh Aizawl Smart City Ltd. hnuaia Aizawl New Market in sak thar mek an enfiah a; in satute chu tun aia chak zawka sa turin thawk turin an chah a ni.