Mipuiin Lungdaia PE office an tichhia

Lungdai mipuite chuan hun eng emaw chen kawlphetha an hmuh ṭhat loh em avangin January 28, Pathianni chhun khan Lungdai Sentlanga Power & Electric department site office kut an thlâk a, an tichhe nual.

Thu dawn danin, Lungdai khua hian kum thum kal ta vel aṭang khan kawlphetha an nei ṭha lo ṭhin a, sorkar term hmasaa PE Minister hnenah pawh thlen ṭhin mahse awmzia a nei thei lo. Tun hnaiah pawh kawlphetha an neih ṭhat loh avangin tui pump theih a ni lo a, tui an lei a ngaih phah fo a ni.

PE department-in Bairabi-a mi transformer an lâk chu January 26, 2024 khan Lungdaiah phurh thlen a ni a, mahse, harsatna a awm avangin an tinung mai thei lo. Tui pump-na atan PE department chuan Bûkpuia transformer lak an tum a, transformer la turin Pathianni khan Lungdai khua chuan hnatlang an ko a ni. Mahse, PE department lamin hrui (wire) a awm loh chhuanlama hmangin tranformer lak chu an lo ṭhulh leh si a; hnatlang tur chhuak khawm mipui thinrim chuan Lungdai Sentlanga PE department site office chu an bei ta a ni.

Lungdai mite hian PE site office bang leh signboard an tichhe nual a, office chhunga bungrua erawh tihchhiat an nei lo nia thu dawn a ni.

PE department hotute'n Lungdai an pan nghal a, an harsatna an sawi hnuah mipui chu an ṭîn darh a; kawlphetha pawh an pe nghal bawk.