In ṭhiat duh lote January 31-ah sorkarin ṭhiah luihsak a tum

Serchhip Competent Authority for Land Acquisition (CALA) David Lalthantluanga, bawrhsap hoin nimin khan DC meeting hall-ah VC te, NHIDCL leh sorkar hotute'n NH-54 kawngpui laih meka zangnadawmna la tawh, in ṭhiat duh lote chungchang an sawiho. January 31, 2024 hian magistrate kaihhruaiin in ṭhiah ngaite ṭhiah a, kawng siamna dâla bungraw dahte hnâwl sawn an rél.

Ṭhutkhawmah hian Chhiahtlang, Khumtung, Baktawng, Chhingchhip, Keiṭum leh Bungtlang VC-te an tel a; zangnadawmna la tawh, an in la ṭhiat lo mi 20 chuangte chungchang ngaihtuah a ni. In ṭhiat lote harsatna tawh dante sawiho niin, complaint thehluttu ṭhenkhat chu anmahni koh an ni a, an harsatna tawh dante sawifiahtir an ni.

NH-54 kawngpui siam hi March 31, 2024-ah zawh tura tih a nih avangin sorkar laipui aṭangin nawrna a nasa tawh a; zangnadawmna sum an dawn tur ang dawng kim tawh, an in la ṭhiat duh si lote chu magistrate kaihhruaiin January 31, 2024-ah khawl hmanga ṭhiah an rêl. In ṭhiah ngaite chu IPC Section 188 tlawhchhanin thubuai siamsak tur an ti bawk. In ṭhiat turte chu team paliah ṭhen an ni.

Serchhip District Administration chuan in inṭhiahsak a ngaih loh nan in la ṭhiat lote chu ṭhiat vek turin an hriattir nawn leh bawk.

Ṭhutkhawmah hian assessment tih hmaih vanga zangnadawmna la tur, la dawng rih lote chungchang pawh sawiho a ni a; zangnadawmna an lâk ngei theih nan hmalak an rêl a ni.