Pariksha Pe Charcha hun hmang

Prime minister Narendra Modi hoin nimin khan New Delhi-ah Pariksha Pe Charcha vawi sarihna neih a ni a; Mizoram aṭangin Governor Dr Hari Babu Kambhampati leh a nupui bakah, zirlai, nu leh pa, zirtirtu leh School Education department hotute'n Mizo High School multipurpose hall aṭangin biak hmuhna kaltlangin an chhim.

Prime Minister thusawi thlirho hmaa inkhawmah Larsap chuan, Pariksha Pe Charcha chu zirlai tam takin exam an huphurh vanga rilru lama harsatna an neih ṭhin tihziawmna tura hmalakna a nih thu a sawi a, "PM chuan zirlai tam takin exam hmachhawn an huphurh vanga harsatna an tâwk ṭhin hi a vei a, amah ngei pawhin zirlaite kawng kawhhmuhna atan Exam Warriors tih lehkhabu a ziak. Zirlaite hi ram nghahfâkte an nih avangin ram tan an hlu a, an rilru hriselna lam kan ngaih pawimawh tlân a ngai," a ti.

Governor chuan, exam a ni emaw, harsatna eng pawh huaisen tak leh huphurhna nei loa hmachhawn a nih chuan, harsatna pal ngamtute'n hlawhtlinna lian zawk a hlawh chhuak ṭhin tih sawiin, "Zirlate tan exam hi a tàwpna a ni. Mark hmuh tlem hi hlawhchhamna tehna a ni lo a, mark hmuh tam pawh hlawhtlinna tehna a ni lo. Rilru chak leh chak lote hian hlawhtlin theihna an neih dan a intiat vek," a ti a; exam chungchanga zirlaite harsatna awm theite zirtirtu leh nu leh pate an ngaihven a, an ṭanpui a pawimawh thu a sawi.

Governor-in thu a sawi zawhah PM Narendra Modi thusawi ngaihthlak a ni.