MP Vena'n ramri khuate a tlawh

Rajya Sabha MP K Vanlalvena chuan kar kal ta January 24-27, 2024 chhung khan Mizoram chhim lama Myanmar ramri dep khuate a tlawh a; India sorkarin India leh Myanmar ramri hung a tumah Ṭiau lui leh Chhimtuipui lui chu pi leh pu aṭanga mipui lui ramvahna a nih avangin ramri hung páwna dah chu an tan pawm theih a nih loh thu an lo hrilh.

K Vanlalvena chuan, Myanmar ramri hnaih khua eng emaw zat a tlawh a, India leh Myanmar ramri hung tumna awm mekin a nghawng theih turte a enfiah bakah, ramri depa awm mipui ngaihdante a zawt a ni.

Rajya Sabha MP hnenah hian ramri hnaih khaw mite chuan, Myanmar nena Mizoram inkar ramri thui tak chu Ṭiau lui leh Chhimtuipui luite a nih thu sawiin, lui pahnih chu pi leh pu aṭanga lui ramvahna a nih avangin ramri hung páwna dah chu pawm theih a nih lo loh thu an lo hrilh a; MP chuan, mipui ngaihdan chu sorkar laipui hotute hnenah thlen ngei a tum thu a sawi.

MP hian Mizoram chhim tàwpa Myanmar ráltlân hruaitute Chapui khuaah kâwmin, khaw chhung mite nen an inkara harsatna awm theite a sawipui bakah, ráltlân naupangte sikul zirtirtu hlawh a tumpui tur thu a sawi a; ráltlânte lo tuamhlâwmtu Mizoram mipui laka ṭhat chhuah lêt ve chu an tihmâkmawh a nih thu a hrilh.

K Vanlalvena hian MP a nihna anga model village-a a thlan zinga mi Phúrà leh Pángkhua a tlawh bawk a; Phúràah khawtlang tihhmasawn dan tur hrang hrang khawtlang hruaitute a sawipui a, Pángkhua chu ram dang nena insumdawn tawnnaa kawng pawimawh tak a la nih dawn avangin kawngpui sialna turazangnadawmna vanga harsatna awm ṭhinte tihkian a pawimawhzia a sawipui a ni.