2023 chhungin Police-in NDPS Act hnuaiah mi 385 an man, Myanmar lam mi 55 an tel

Mizoram Police Headquarters-a Training Branch leh Narcotics Control Bureau chuan Mizoram police-te tana nimin aṭang khan Narcotic Drugs and Psychotropic Substances Act (NDPS Act) leh a kaihhnawih dan zirhona Aizawl SP conference hall-ah an buatsaih ṭan a, DGP Anil Shukla-a'n a hawng. Kum 2023 chhung khan police-in NDPS Act thubuai 385 an ziak lut a, mi 385 an man zingah Myanmar lam mi 55 an tel.

Mizoram police tarlan danin, kum 2023 khan police-te'n heroin kg. 68.055, methamphetamine kg. 154.172, crystal meth kg. 49.005, ganja kg. 112.943, pseudoephedrine (khehpuam) kg. 210.72, opium kg. 4.918 leh codeine ûm 112 an man.

Ruihhlo chi hrang hrang an man kaihhnawihah NDPS Act hnuaiah thubuai 385 an ziak lut a, mihring an man zat pawh 385 an ni a, an zinga mi 55 chu Myanmar lam mi an ni. Kum 2023 chhunga police-in ruihhlo an mante chu tualchhung hralhna angin Rs 49,02,42,395 man a tling.

Zirhonaa khuallian Anil Shukla, Mizoram DGP chuan, Mizoram chu ruihhlo tawlhrûkna kalkawng a nih thu sawiin, "Kawng thar tam tak a awm bawk. Hengte hi police leh kan thawhpui agency dangte pawhin kan vên hneh a ngai a, agency dangte nen thawhhona ṭha tak kan neih zarah police-te chuan ruihhlo tam tak kan man a, a kaihhnawihah mi tam tak kan man bawk," a ti.

Anil Shukla chuan, ruihhlo man tam ringawt chu a tâwk lo tih sawiin, "Ruihhlo lo kalna leh a kal zelna tur nen lam kan chhui chhuah a ngai a, ruihhlo do hi indona kan hneh ngei tur a ni," a ti a; ruihhlo dona leh ruihhlo chhuina atan zirhona chu hmang ṭangkai ngei turin kal khawmte a chah.

Zirhona hawnna hi DIG (Training) LR Dingliana Sailo-in a kaihruai a; district 11 aṭangin police 46 an tel. NCB lama mithiamte’n NDPS Act, NCB reward policy, ruihhlo zawn, man leh a kaihhnawih thil te, financial investigation, finfiahna pawimawh dante leh thil dangte an zirtir a ni.