KHAWTHLIR

Kawlphetha pe thei dawn lo

Power & Electricity department chuan vawiin chawhma dar 10 aṭanga chawhnu dar 2 thleng 33kV Sub-Station, Tlangnuamah hna an thawk dawn. Hei vang hian khua/veng ṭhenkhat - Mission Veng, Mission Vengthlang, Khatla South, Khatla East, Nursery Veng, Tlangnuam, Tlangnuam Vengthar, Saikhamakawn, Melthum, Hlimen, Ailawng, Reiek, Samthang leh Lunglengahte kawl-phetha pek a ni dawn lo.

PC-in eptu tangkai ber nih an tum

PC party president Vanlalruata chuan nimina an party pisaa office bearer ṭhutkhawmah thu sawiin, eptu party ṭangkai ber an nih dawn thu a sawi a, "ZPM party-in sorkarna an chang a, PC party policy tihpuitlin intiam an ni a, an che vel erawh chuan a hawi rih lo, kan thlir zel ang," a ti.

Watermanship training buatsaih

J Buana College Youth Adventure Club leh NSS chuan January 24-27, 2024 chhung khan Saibu, Chhimtuipui-ah White Watermanship Training Course an buatsaih a, zirlai 27 leh thawktu pahnih an kal. Training-ah hian white water swimming - suar leh tui luang pangngaia tui hleuh dan, suara chêtsual palha inhumhim dan, ramhnuaia mahnia chêttlat dan - jungle survival skill leh training chi hrang hrang an zir a ni.

CM Relief Fund

Chief minister Lalduhoma chu nimin khan CM Bangla-ah Israel rama awm mek Mizo aiawhte'n hmuin, lawmpuina leh duhsakna an hlan. Nimin vêk khan ZPM Chanmari Unit-in CM Relief Fund atan CM hnenah Rs 10,000 an hlan a; Second Class Contractor Association-in Rs 20,000 leh Mizoram Sericulture Service Association-in Rs 30,000 an thawh bawk.

MSU an zualko

Mizo Students Union chuan Mizoram University-a Meitei hnam awmte chêt dana an lungawi lohna ziakin MZU Registrar hnenah nimin khan an thlen. MSU chuan, tun hnaiah MZU-a Meitei zirlaite’n Manipur-a Zo hnahthlakte tihchimihna tur hmanraw lei nan sum an khawn nia sawiin, "Rálmuang taka kan dah laia hnung lam aṭanga min vit lêt hi kan ngaithiam lo tak zet," an ti.