PWD Minister-in kawng siam a endik

PWD minister Vanlalhlana chuan nimin khan Aizawl-Thenzawl-Lunglei (ATL) World Bank RFoad siam leh chei ṭhat hna thawh mek a enfiah a; contractor-te chu kawng ṭha leh tlo, hun rei tak daih tur siam turin a hrilh.

Vanlalhlana chuan, kawng siam hna thawktute chu uluk taka thawk tura chahin, "Kawng ṭha siam sorkarin a ngai pawimawh hle a, in kawng siam a ṭha tâwk em tih thuneitute'n an vil reng dawn," a ti a; contractor-te chu kawng ṭha leh tlo, hun rei tak daih tur siam turin a hrilh a ni.

PWD Minister hi Lunglei High Powered Committee vice chairman V Malsawmtluanga, MLA leh Lunglei West bialtu MLA Lalhlimpuia bakah, PWD chief engineer David Sapzova leh engineer-te'n an ṭawiawm a ni.

ATL World Bank Road siam leh cheiṭhat hna hi SASCI-II sum hmanga thawh a ni a, PWD Hmuifang Division leh Lunglei Division-te'n an vil. Hmuifang Division chan lamah Defect Liability Period-in a la huam chin km. 71-83 a thui kawngpui thawm ṭhat hna thawh a ni. SASCI-II sum cheng vbc 13.22 hmangin ATL road chainage (km. 83-100) thawm ṭhat hna thawh a ni bawk.

Lunglei Division chanah SASCI-II hnuaiah kawngpui thawm ṭhat hna hlawm hnihah ṭhen a ni a, contractor pahnihin an thawk. Hlawm khatna chu km. 120-130 a ni a, cheng vbc 6.58 hmanga siam a ni. Hlawm hnihna chu km. 100-120 niin, cheng vbc 6.47 hmanga siam a ni thung.