Sesih mipuiin doctor chhuak tur an dang

Sesih Primary Health Centre (PHC) medical officer Dr Eric Zaukhnina chu thlaktu awm loa sawn chhuah tum a nih avangin Sesih mipui an lungawi lo a, nimin khan doctor chhuak tur an dang.

Sesih aṭanga thu dawn danin, January 25, 2024 khan Dr Eric Zaukhnina transfer order a chhuak a, Tipa PHC-ah awm tura tih a ni a, mahse, amah thlaktu tur dah a ni lo.

Doctor transfer chung­changah hian Sesih khuaa pawl hrang hrangte chu January 28, Pathianni khan an ṭhukhawm a, doctor chhuak tur chu dan an rêl a ni.

Khawtlang hruaitute rorel angin, Dr Eric Zaukhnina'n nimin zing aṭang khan an khua a chhuahsan theih loh nan kawngpuiah an dang a; transfer order sût emaw, a aiawh dahna tur thupek a awm hma chuan dan an tum thu an sawi.

Sesih VC leh pawl hrang hrangte chuan thuchhuah siamin, Sesih PHC chu kum 1986-a din a ni a, kum 33 chhung doctor dah a nih loh hnuah October 2020 khan doctor dah a nih thu an tarlang a, "Kan chhawr ṭangkai em em a, thlaktu awm loa sawn chhuah a ni hi pawi kan tiin hriatthiam har kan ti hle a ni," an ti. Sesih bakah, a ṭhenawm khaw pathuma VC-te pawhin Sesih khawtlang hmalakna an thlàwp thu an tarlang bawk.

Hetih lai hian, bialtu MLA Ramthanmawia chuan nimin khan Health minister Lalrinpuii hnenah lehkha a thawn a; mipui mamawhna a sàn em avangin Dr Zaukhnina transfer order chu sût turin a ngen a ni.