ZORO-in Amit Shah thlalak an hâl
India sorkarin India leh Myanmar ramri hung a tum leh Free Movement Regime (FMR) tihtawp a tum duh lohna lantir nan Zo Reunification Organisation (ZORO) chuan nimin khan Union Home minister Amit Shah lim/thlalak an hâl.
ZORO hian nimin khan MZP Conference Hall-ah Chin Lushai Conference vawi 123-na an hmang a, sorkar laipuiin India leh Myanmar ramri hnaih km. 16 huam chhunga zalen taka inkal pawh theihna FMR tihtawp a tum leh ramri hung a tum chu ṭha lo an tih avangin, a meizang hlaptu bera an ngaih Union Home minister Amit Shah thlalak an hâl nghal a ni.
ZORO chuan, India sorkar chu Zo fate ṭhen darh tumah an puh a, "FMR nuaibo tumna leh India leh Burma ramri hung tumna awm mek hi kan duh lo a, kan dodal zel dawn a ni," an ti.
Nimina Chin Lushai Conference hi ZORO president R Sangkawia'n a kaihruai a, thil chi hrang hrang an rél. 'Khawvel hmun hrang hranga Zo fate'n rorelna pakhat hnuaia awm kan duh em' tih chungchangah Mizoram mipui ngaihdan lak an rél a; Mizoram mipui tam zawkin rorelna pakhat hnuaia awm an duh chuan United Nations Organisation (UNO)-ah thlen a, rorelna pakhat hnuaia an awm theih nan chak taka hmalak rêl a ni.