Sorkarin thlarau MR endik a tum; 'Ni 100 chhunga tih tura duante ni 53 chhungin kan ti kim tawh' - HM

ZPM working president K Sapdanga, Home minister chuan, sorkarin ni 100 chhunga tih tura a duante chu ni 53 chhunga a tih kim tawh thu a sawi a, "Sorkarin thlarau muster roll (MR) a endik dawn," a ti.

Nimina ZPM pisaa inkhawmah thu sawiin K Sapdanga chuan, sorkar an siam tirhah ni 100 chhunga thawh tur Chief Minister-in a puan thu a sawi a, "Bul ṭan nghal a ni a, inrenchemna kan thupui a, MLA tharte'n motor a thlàwna cheng nuai 10 an dawn tihtawp niin, second khat chhungin cheng nuai 400 kan hlép nghal. Ni 100 chhunga tih tur kan ruahmante kan tihlawhtling mek a, ni 53 chhungin kan ti kim tawh," a ti a; ni khatna aṭangin inrenchemna an kalpui ṭan thu a sawi.

ZPM Working President chuan, thlarau MR hlawha behtir ṭhin a awm tawh lo tura ngaih a nih thu sawiin, "Uluk taka endik a ni dawn a, man chhuah tur awm lo hrâm se kan duh tak zet," a ti.

Hun vawn dik kawngah sorkar an entawn tlak thu sawiin Sapdanga chuan, "Hun vawn dik kawngah hian sorkarin kohhran kan zui ang a, biometric attendance device hman a ni dawn. Sorkar pisa ṭan hun hi zing dar 9 a ni a, tunah chuan tlai dar 4-ah bàn tur a ni," a ti a; sorkar office hun chhung ngai pawimawh turin sorkar hnathawk zawng zawngte ngen an nih thu a sawi.

K Sapdanga chuan, CM tiamin minister-te'n car pakhat leh support car pakhat chauh an kawl tawh thu sawiin, "CM leh minister zin inzui vak vakte tihtlem tumin a hautak lo zawnga hmalak a ni. Chutih laiin, loh theih loh chin a awm a, kan hriatthiam a ngai. Zirlaite'n minister hmuah khap a ni a, inzâwn pawh kan remti lo. Minister leh MLA-te'n thawktu leh an dawn theih tam tak a zatvea tihhniam a ni a, office leh bangla bungraw thar lei rih loh a ni a, sorkar kum thar tur hi year of consolidation-ah puan a ni," a ti.

Sorkar hmasaa work order nei, hna ṭan tawhte chhuhsak an tum loh thu sawiin Sapdanga chuan, "Hna quality lamah erawh kan fet hle dawn a, hna la ṭan lo chu stay nghal tur a ni. Hmachhawp leh tihfel tur a la awm nual. Monitoring Committee kan din a, recognised party tin aiawh, kohhran aiawh leh NGO aiawhte an tel dawn," a ti a; hlemhletna do turin Mizoram mipui a sáwm.