RTI Act-in dilna 18,985 a lut tawh

Mizoram Information Commission hotute leh MJA member-te nimin khan Chief Information Commissioner (CIC) pisaah an inkâwm a; CIC John Neihlaia chuan, Mizoramah RTI Act hman a nih aṭangin information dilna 18,985 a luh tawh thu a sawi.

John Neihlaia sawi danin, MIC din a nih aṭanga nimin thleng khan RTI Act tlawh chhanin sorkarah dilna 18,985 a lut tawh a, lungawi loh vangin MIC-ah second appeal 136 leh complaint 157 a lut tawh a, MIC-a second appeal/complaint lut hi application lut tawh zawng zawng aṭangin 2% a tling lo.

CIC chuan, SPIO chhannaa lungawi lo, Departmental Appellate Authority (DAA) zualkote lakah DAA-in an tih tur an ti lo deuh nia a lan thu a sawi a, "Statistics-a a lan dan chuan SPIO-a lungawi lo, DAA-a zualkote hi DAA hian an lo chinfelsak ṭha lo deuh niin a lang," a ti.

CIC tarlan danin, July 1, 2022-ah MIC leh a thawhpuite'n Mizoram RTI Online an hawng a, website leh mobile application aṭangin RTI Act tlawhchhanin dilna thehluh theih a ni. Mizoram RTI Online-ah nimin thlengin dilna 8,137 a lut tawh a, online-a dil theih a nih hnuah dilna a luh a tam phah hle.

John Neihlaia chuan, village council leh local council-te pawh sorkar sum khawihtu an nih avangin an hnenah RTI Act tlawhchhanin information dil theih a nih thu a sawi a, "LC leh VC-te hi public authority-ah puan an ni a, LC chairman leh VC president-te hi SPIO an ni. DAA chu LC-ah AMC Joint Commissioner a ni a, VC-ah District Local Administration Officer (DLAO)-te an ni," a ti.

CIC sawi danin, RTI Act, 2005-a Section 4(1)(b) angin, sorkar office tinin an office-a an hmalakna leh hmachhawpte RTI Act hmanga dil ngai loin mipui hriat theih turin notice board, chanchinbu, tlangau (public announcement) leh website hmangin an tarlang/puangzar tur a ni.

Hmalakna leh hnathawhte suo moto hmanga website-a tarlang ṭha lo department 40 chuang hotute chu kum 2023 khan MIC-in a ko tawh a, an hmalakna tarlang ṭha taka tawh turin an hriattir. MIC lamin an theih tawkin an vil mek bawk.

John Neihlaia chuan, MIC-ah thawktu LDC chin chung lam mi 13 chauh an nih thu sawiin, "Suo moto discloser monitor turin thawktu hman theih mi pahnih chiah kan nei," a ti a; suo moto discloser ti ṭha lote vilpui turin journalist-te a sawm a ni.

Inkawmhonaah hian information commissioner Mangjangam Touthang leh secretary Dolianbuaia te pawh an tel a; zawhna leh chhanna hun hman a ni.