SEDP hnuaia thawktute chungah sorkar hian ngilneihna lantir hrâm rawh se - Lalchhandama

MNF Legislature Party leader Lalchhandama Ralte chuan, MNF sorkarin SEDP hnuaia thawktu a lâkte chungah sorkar tharin ngilneihna lantir se a duh thu a sawi a, sorkarin Mizoram Subordinate Services Selection Board (MSSSB) ṭhiah a tum chu pawi a tih thu a sawi bawk.

Nimina Mizo Hnam Rûna MNF inkhawmah thu sawiin Lalchhandama Ralte chuan, MNF sorkarin SEDP hnuaia thawktu a lakte chungchangah, "An kal zel dan tur leh engtin nge hma an lâk zui dawn tih ka zawt a ni. Chhungkaw sang télte hlauthâwng leh mangangin an awm mek a, an hma lam hun ngaihtuahin an indawmkun mek. Heng ho chungah hian kan sorkar hian ngilneihna lantir hrâm rawh se," a ti a; School Education department-a hmalakna pawimawhte chu sorkar tharin chhunzawm se a duh thu a sawi.

Lalchhandama Ralte chuan, "Sorkar hmasa hmalakna a nih vang ringawtin kan sorkar thar hian thil ṭha hnâwl ngawt lo se. Thil ṭha an tihah kan lawm a, kan thláwp zel ang. Ṭha zawk tura mipuiin an ngaihte'n kan phur an rawn phur ve dawn ta a, eng nge a nih kan hre thuai dawn. An nihna diktak hi kan hre thuai dawn a ni," a ti.

Assembly Opposition Leader chuan, MSSSB chungchangah, "Ṭhalai hna zawng mek mi sing rualte innghahna leh an future MSSSB ṭhiah tumna a awm hi a pawi tak zet. Result chhuak tur eng emaw zat a awm a, dan ang thlapa advertisement chhuak tawh leh form fill-up tawh, cheng nuai 17 chuang lut tawhte kha engtia hmalak zui tumna nge awm?" a ti a; MSSSB hmalakna kal lai chu MPSC-ah an hlan chhâwng dawn em tih chu a zawhna a nih thu a sawi.

MNF sorkarah kum hnih chhung Covid vangin hnathawh tak takna hun an nei tlem tih sawiin Lalchhandama chuan, "Kan sum pûk sawisel nasa em emtute khan ni 50 pawh a liam hmain cheng vbc. 80 an pûk leh nghal. Sum enkawl thiam loa min puhtute hnuaiah ni 15 lai treasury a kal thei ta lo. Bureaucrats leh intellectual an mangang ru hle a, kut hnathawktute pawh an mangang ta hle a ni," a ti.

Lalchhandama Ralte chuan, ZPM sorkar chu a tìr aṭang an hla key la sang lutukah puhin, "An term chanveah chuan 'doh' sang an sa phâk tawh lo ang," a ti a; SEDP sum chhungkaw 60,000 chuang hnena a thleng ta lo chu pawi a tih thu te, sorkarin health care atan cheng vbc. 40 dah tura an tih leh kut hnathawktute price support atan cheng vbc. 110 dah tura an sawi chu an la dah loh thu a sawi bawk.