Kolasib KVK ram sah thlâka mimal hnena pek tum sût dawn

Agriculture minister PC Vanlalruata chuan Kolasib-a Krishi Vigyan Kendra (KVK) ram, mimal hnena sahthlak tumna chu sût vek a nih dawn thu a sawi a, "Sorkar aṭanga hma­sawnna tura hmalakna atan sorkar ram awm sa roh a ṭul avangin ram sah thlak phal a ni dawn lo," a ti.

Minister PC Vanlal­ruata hian nimin khan Thingdawl Agricul­ture Farm, Krishi Vigyan Kendra (KVK) Kolasib leh Kolasib-a Agriculture office-te a tlawh a ni. Kolasib KVK ram, mimal in hmun atana sah thlak tuma hmalakna chungchangah DC aṭangin hma la chhunzawm lo turin stay order chhuah a nih tawh thu a sawi.

Minister chuan, "Kut hnathawh thil chàwisàn a nih theih nan leh sorkar aṭanga hmasawnna tura hmalakna atan sorkar ram awm sa roh a ṭul avangin ram sah thlak phal a ni dawn lo. Ram pek tuma hmalakna awm sa pawh sût vek a ni dawn," a ti a; chenna in nei lote chu thlaphâng lo tur leh an dinhmun chu sorkarin a ngaihtuah tur thu a sawi.

Kut hnathawktute din­chhuahna atan sorkarin theih­tawpin hma a la dawn tih sawiin Vanlalruata chuan, "Kut hnathawktute hamṭhatna chu sorkarin a ngaih pawimawh ber pakhat a nih avangin Agriculture department hming pawh Agriculture & Farmers' Welfare depart­ment tia thlak tuma hma­lak mek a ni," a ti.

PC Vanlalruata chuan, kut hnathawktute'n an thil tharte hralhna tur (market) ṭha tak a awm sa tih hriaa ngaihngam taka hma an lak theih nan market ngaihtuah a ni dawn tih sawiin, "Kum tharah market eng emaw zat puan belh tum a ni a, thil thar lei tur zingah buh lei tel tuma hmalak a ni dawn," a ti a; ram neih chungchangah inkhuahkhirhna felfai zawk a awm theih nan Mizorama leilet leh huan ram neitute khawl hmanga chhinchhiah tum a nih thu a sawi bawk.

Agriculture Minister hian Thingdawl Agriculture Farm-a NABARD RIDF sum nuai 150 hmanga Seed Processing & Seed Storage Unit sak mek leh, cheng nuai 258.89 sênga Solar Powered Cold Storage for Potato Seed sak mekte a tlawh a ni.