Vairengteah hmunphiah hring kg.-ah Rs 35 aia tláwm loa lei turin an inrem

Mizoram sorkar chuan hmunphiah ro man kg. khatah Rs 100 a bithliah a, a hring man a bithliah lo nia hriat a ni. Vairengtea hmunphiah chíngtute leh lei tumtu hnam dangte chu hmunphiah hring kg. khatah Rs 35 aia tlawm loa lei turin an inrem.

Vairengte mite hmunphiah tharte chu hnam dang (mahaldar)-te'n kg. khatah Rs 25-a leisak an tum nia thu thehdarh chungchangah Vairengtea hmunphiah neitute chuan, "A hring hlirin kan hralh ṭhin a, tunah hian kg. khat Rs 35 aia tláwm loa lei turin inremna kan siam," an ti.

Hmunphiah neitute chuan, Mizoram sorkarin hmunphiah hralhna tur rate chu a ro (dry)-ah chauh a siam thu sawiin, "A hring hralhna rate tur hi an lo hmaih palh a ni ang," an ti a; tuna rate, kg. khatah Rs 35 aia tlem lo tih chu Mizoram sorkarin a bithliah a ni lo a, Vairengtea hmunphiah neitute leh lei tumtute inremna a nih thu an sawi.

Hmunphiah chu kum dangah chuan a hring kg. khat Rs 40 aia hniama an hralh ngai meuh loh thu sawiin, "A rate hi a danglam fo a, ni tin a danglam a, a cháng chuan Rs 43- 44 a kai chángte pawh a awm. January 15 aṭanga February 15 inkar hi first class (keh hun ṭha ber) a ni a, February 15 hnu lamah chuan a ṭhat lai ber a ni tawh lo a, a man pawh a tlahniam ṭhin," an ti.

Hmunphiah neitute chuan, an zingah hmunphiah hralh an la awm vak loh thu sawiin, "Vawiin (January 29) aṭangin an bûk ṭan dawn," an ti. Hmunphiah hringte chu Forest check gate paltlangtir phal loh a nia sawi chungchangah, "Paltlangtir an phal lo a, mahse, tunah chuan an phal tawh," tiin an sawi.

Hmunphiah chu a ṭhat lai ber huna seng tur chuan thla khat chhunga seng zawh a ngaih thu sawiin, "January 15 - February 15 inkar hi a ṭhat lai ber a nih avangin tunah pawh kan tlai mah mah tawh," an ti. Kuminah hian hmunphiah aṭangin chhiah (royalty) an âwl dawn leh dawn loh an la hriat loh thu sawiin, "Kum dangah chuan kg. khatah Re 1-te kan chawi ṭhin," an ti.

Vairengte mite hian an khaw chhehvelah hmunphiah hmun an nei hlawm a, a hmunpui ber chu Aitlang ram a ni. Aitlanga hmunphiahte seng turin harsatna an tâwk rih lo.

Thu dawn danin, January 25, 2024-a Land Resources, Soil & Water Conservation (LRSWC) department-in hriattirna a chhuah dan chuan, hmunphiah ro man chu kg. khat Rs 100 ni turin sorkarin a bithliah a, a lei turin RR Associates, Kamrup, Assam a thlang.

Chutih rualin, "Hmunphiah lei duhtu mi dang an awm chuan an lei thei tho ang a, sorkar rate aia toa an leina tur chu a changtu society-te nen an inbiakremna ang a ni ang," tih a ni.

January 16, 2024-a LRSWC minister Lalthansanga hoa thuneitute ṭhukhawm chuan, kumin bik atan kut hnathawktute tan tax holiday (chhiah àwl kum) puan an rêl a, chuvang chuan hmunphiah aṭangin royalty lak loh tura rêl a nia thu dawn a ni. Environment, Forest & Climate Change department chu an check gate-ah hmunphiah kaltlangtir phalna (transit permit) pe tura ruat an ni bawk.